Iasoi MoA ka NTPC bad ka Ri Bhoi District ban seng ia ki STEM Labs ha ki 27 tylli ki skul

Shillong, Jymmang 1: Ka National Thermal Power Corporation Ltd (NTPC) kala iasoi ia ka Memorandum of Agreement (MoA) bad ka bor district ka Ri-Bhoi ban seng ia ki STEM Laboratories ha ki 27 tylli ki skul Sorkar ha kylleng ka District, kaba dei hapoh ka Corporate Social Rresponsibility (CSR) na ka bynta ka thain Shatei Lam Mihngi ka Ri.

Ia kane ka soskular la pynskhem ha ka sngi Palei hapoh ka Ophis u Deputy Commissioner ha Ri-Bhoi ha ka jingiadonlang u Deputy Commissioner Abhilash Banranwal bad u Head of HE ka NTPC Bongaigaon Amit Kr Asthana.

Hapoh kane ka prokram, ka NTPC kan ai ia ka jingkyrshan song pisa ba kot haduh T. 1.48 klur na kabynta ban seng ia ki STEM Laboratories ha ki 27 tylli ki skul Sorkar, da ka jingthmu ban pynkhlain ia ka jingpule ha ka lain saian, ka jinglah ban leh ia kiei kiei kiba thymmai bad ka sap ban weng ia ki jingeh hapdeng ki khynnah skul.

Ka projrect kan kynthup ia ka jingpyntrei ia ki jingtei, ka jingthied ia ki STEM kits jong ka juk ba mynta, ka jingai jinghikai ia ki nonghikai bad ka jingkyrshan pisa ha ki kam maramot.

Ka bor district ka Ri-Bhoi kan long kum ka agency ban pyntrei ia ka project bad kan hap shim ia ka jingbahkhlieh ban pyntrei, thied ia ki tiar, pynthikna ia ka jingbha ki tiar bad ka jingiatreilang bad ki skul ki ban ioh jingmyntoi.

Ka NTPC kum ka nongbei tyngka, kan peitngor ia ka jingiaid ki kam lyngba ka jingshong jingialang bishar kam man ka por, ka jinghiar jurip ia ki skul bad ka jinglum jingkhein ia ki jingmyntoi ba ka ai khnang ban pynthikna ia ka jingpyntreikam bha ia ka project.

Ia ki STEMS Laboratories yn seng hapoh ki jingtei bala don lypa jong ki skul bad kin kynthup ia ki tiar ai jinghikai ka juk ba mynta kum ki tiar rabot, ki kor pynmih bording naka suinbneng, ki tiar electronic bad ki digital learning aids.