Tripura | Ka jingkulmar hadien ka result elekshon ha Khowai | Lum ki bor District ia ka jingialang ban wanrah jingsuk

Agartala, Iaiong 30: Ka jingkulmar ka dang ïai bteng ha ki katto katne ki jaka jong ka ADC ha Khowai district hadien ka jingpynbna ïa ka result jong ka elekshon jong ka Autonomous District Council (ADC), ha kaba la mih ki jingkynnoh ba la don ka jingïakynad kaba la saphriang hapdeng ki seng saiñpyrthei bapher bapher.

Katkum ki khubor ba la ioh lum, palat 300 ngut ki nongtrei ka BJP, la kynnoh ba ki la shah pynkynriah jaka namar ka jingshah thombor ha ka sain pyrthei, kiba la leit rieh tngen ha ophis jong ka BJP ha Khowai district hadien ba ki la shah pynbor ban phet krad na la ki jong ki iing ki sem.

Ha ka jingïohi ïa ka jingsniew jong ka aiñ halor ka shongsuk shongsain, ka bor pyniaid distrik jong ka Khowai ka la khot ïa ka jingïalang kaba kongsan jong baroh ki seng ha ka janmiet jong ka sngi Balang ha conference hall jong ka District Magistrate’s office ban wanrah biang ia ka shongsuk shongsain bad jingïatylli hapoh ka distrik.

Ha kane ka jingialang la ia donlang da u Rajat Panth uba dei u District Magistrate ka, Sub-Divisional Magistrate u Nirmal Kumar Jha, Additional Superintendent of Police u Justin Joseph, bad u SDPO D. Khudia Rassu. Ki ningmih khmat na ka BJP, Tipra Motha, Congress, bad CPI (M) bad ruh kila ia shim bynta ha ka jingiakren.

Ka jinglong jingman ha ka jingialang ka la kylla khluid namar ki seng sain pyrthei ki la pynmih la ki jong ki jingkynnoh pyrshah halor ki jingjia jong ka jingshah thombor.Ki nongialam ka BJP ki la kynnoh ba ki nongkyrshan jong ka Tipra Motha ki la thombor ia ki nongtrei ka BJP, ki la thang ia ki iing ki sem, bad ki la pynbor ia ki longiing kiba la shah pynkynriah jaka ban wad jaka rieh ha ophis jong ka party district.Ka BJP ka la kynnoh ba la bthah ïa ki lanot ban siew pisa kaba heh ban leit phai noh sha la ki jong ki ïing ki sem da kaba suk.

Haba jubab ia kitei ki jingkynnoh, u MDC ba dang shu jied thymmai ka Tipra Motha, u Atul Debbarma, u la kyntait ia baroh ki jingkynnoh, da kaba ong ba ka party kam ngeit satia ia ki kam thombor bad ka angnud ban pynneh ia ka jingsuk. U la kynnoh ha ka jaka kata ba ki nongialam ka BJP ki pynngat thok ia ki nongtrei Tipra Motha ha ki kam runar, da kaba kynnoh ba bun ki nongkyrshan jong ka party ki la shu shah set phatok khlem daw.

U MLA ka Tipra Motha u Ranjit Debbarma u la kynthoh ruh ba ki bor pyniaid jong ki pulit ka leh shiliang khmat.U la kynnoh ba ka administration ka la kylla long tang shiliang hadien ki jingkren pynkhihwin ba la ai ha ka por ïalap elekshon da u Myntri Rangbah ka Jylla u Manik Saha bad u Rajib Bhattacharjee uba dei u state president ka BJP.U la buh jingkylli ïa ka jingsngap jar jong ki pulit halor ka jingkynnoh ba ki la pynjulor ïa kawei ka ophis treikam jong ka Tipra Motha ha ka thaiñ Belfang hapoh 12 Ramchandraghat ha ka por elekshon.

Ha kajuh ka por, ki nongmihkhmat jong ka CPI (M) ki la buh jingkylli halor ka jingpynbna jong ka sorkar jylla ban ai jingïarap pisa kaba ₹25,000 na ka Chief Minister’s Relief Fund sha ki nongtrei ka BJP kiba la kynnoh ba ki shah ktah ha ka jingshah thombor hadien ka jingthep vote.Ki nongialam ka CPI(M) ki la kynthoh ba lada ki nongkyrshan jong ka BJP ki lah ban ioh bai lutksan, te ym dei ban iehnoh ia ki nongkyrshan jong ka CPI (M) kiba la kynnoh ba ki la shah thombor bad shah thang ha ka por elekshon sha ka iing dorbar thawain jong u snem 2018 bad 2023.Kane ka la pynlong sa kawei pat ka jingïakren kaba jur bad kaba khluid bha ha ka jingïalang.

Hadien kata, da ka jingtuklar jong ki heh distrik bad ki heh pulit, ka jingïalang ka la kut noh da kaba suk bad sngewthuh jingmut.Ki nongmihkhmat jong baroh ki seng sain pyrthei ki la pynthikna ia ka bor district ba kin trei ban pynneh ia ka jingsuk jingsain ha la ki jong ki jong ki jaka.

Ha kaba kut jong kane ka jingïalang, u MLA u Ranjit Debbarma u la kyntu ïa ka bor pulit ba kan bat ïa ka jinglong pdeng haba ïakhun ïa ka jinglong jingman.

Hadien ba la sngap ia baroh ki liang, ka bor district ki la pynpaw ba yn shim ia ki lad ki lynti kiba tyngeh ban wanrah biang ia ka jingsuk ha ka district.La pynjur ia ka jingpahara ha ki jaka ba sngewkhia, bad la kyntu ia baroh ki seng sain pyrthei ba kin kiar na ki kam pynkhihwin.Ki bor pyniaid didtrict ki la pynthikna ruh ban pynlong ïa ki jingpyrshang ban ïarap ïa ki longïing kiba la shah pynkynriah jaka ban wan phai noh da kaba suk sha la ki ïing ki sem ha ka por kloi katba lah.