Shillong, Iaiong 29: Ka State Boxing Championship 2025-26 kan sakhi ia ka jingiakura kaba itynnad na kaba itynnad tam lashai ka sngi kaba saw bad kaba kut syndon jong kane ka jingiakob kaban long ha Mawlai Mawroh.
Ha ka jingiakhun ia ka semifinal hynne ka sngi, 4 ngut ki nongiakura kiba dang khynnah kila iakhun tyngeh ha ka rynsan ban ia knieh khur ia ka nam jop.
Ia kane ka jingiakob la pynlong da ka Meghalaya Boxing Association (MBA) da ka jingkyrshan jong ka Directorate of Sports and Youth Affairs. Kane ka Championship ka long na ka bynta ka Junior Boys & Girls (15-16 snem) bad Youth (17-18 snem) ia kaba la phiah shuh katkum ka jingdon ia ka jingkhia.
Ha ka Junior Girls 42-44 kg, ka Isawanbiang Nongsiej (West Khasi Hills) kala pynrem ia ka Elizabeth Ngamlai (West Jaintia Hills) bad ka Soyabanri Nongrang (Eastern West Khasi Hills) kala pynliem ia ka Elishiba Marwein (Ri-Bhoi) lyngba ka Split Decision.
Ha ka 44-46 kg, ka Anisha Kharbani (EWKH) kala pynrem ia ka Pdianghun Kurbah (East Khasi Hills) bad hadien kane, ka Baiamonlang Lyngdoh bad ka Nebadari Rympei kiba na Ri-Bhoi kila iakhun tyngeh para ma ki, ha ka jingiakura hynrei khatduh ka Nebadari Rympei kala ioh khur ia ka jingjop.
Ha ka 46-48 kg, ka Evangeline Sohbar (RB) kala pynrem ia ka Teresa Lamneikern (Rising Star Boxing Association) bad ka Aishisha M Mawroh (Noble Art Boxing Club) kala pynliem ia ka Dafeen L Mawlong (EWKH).
Ha ka semifinal jong ki Junior Boys’ u Arush Biswa (NABC) bad u Shaniaki Shabong (EKH) kila khur ia ka jingjop ha ka 42-44 kg, u Pyndapkupar Marwein (EWKH) bad Damonlang Marbaniang (Green Heart Boxing Club) kila jop ha ka 44-46 kg katba u Freedy Marngar (EKH) bad u Karan Sunar (RB) kila jop ha ka 46-48 kg.
Ha ka kyrdan jongka 50-52 kg, u Ryan Lyngdoh (GHBC) bad u Iaimanbha J Nongrum (EKH) kila long ki nongjop ha ryngkat bad u Arkimanbha Rimen (EKH) bad u Lewanki Pakma (WJH) ha ka 52-54 kg. Ha ka 54-57 kg u Alyn M Marak (West Garo Hills) ula jop pyrshah ia u Baskar Gill (RSBA) katba u Chepyrkhat H Mitri (GHBC) ula pynrem ia u Moses Singh (RSBA) ha ka 57-60 kg.
Ki final jong kine ki kyrdan bapher bapher kin long kiba shongshit bad ka bym long ban pep ban sakhi ia kine kiba long ki khlur ka lawei jong ka jingialehkai Boxing ha ka jylla, ha kaba kin iakhun khatduh sa tang shisen ban khur ia ka nam lahduh.
U MLA ka Mawlai u Bah Brightstarwell Marbaniang, un long u Kongsan ha kane ka sngi pynkut ia kane ka jingiakob bad ia ki 4 sngi jong ka jingiakob ia kura.
