Nongstoiñ, Nailur 28: Kum ka jingkynmaw burom їa ka lyngkhuh snem kaba hynñiew jong ka jingkhlad noh u (L) Maieit Hopingstone Lyngdoh, ka Hynñiewtrep Youth Council Mawthadraishan circle ha ka lah sngi u Blei, ka la pynlong їa ka jingiakop їamareh marathon kaba shiphew kilomitar kaba la sdang na Parїong haduh Nongshilong.
Ha katei ka sngi ki la don haduh laiphew hynriew ngut ki samla kiba la wan ban їashim bynta. Ha katei ka jing їamareh, u samla Shainingstar Marweiñ na ka shnong Lawrynjam u la rah їa ka nam lah duh, u ba wan ba ar u dei u samla Jopkordor Lyngdoh na ka shnong Mawkyllei bad u ba la wan ba lai u dei u samla Banshanlang Kurbah na ka shnong Markasa.
Kane ka Seng kala pynlong ruh їa ka jingїalang ba lyngkot ha madan shnong Nongshilong, ha kaba u bah Korbarlang Syiemlieh sordar jong ka shnong Kynshi Mawteijrong u la long u kongsan bad u bah H.S.Thabah sordar jong ka shnong Nongshilong u la long u symbud kongsan. Nalor kata ha katei ka jingїalang la їadon ryngkat ruh da ka kong S.Lawriniang vice president ka HYC Women wing North Khasi Hills District.
U bah Korbarlang Syiemlieh haba ai jingkren kum u kongsan, u la ong ba ka HYC ka la leh їa ka bynta ka donkam haduh katta katta, kata ban kynmaw burom їa u bah Hopingstone Lyngdoh, u ba long tang ma u, u nongїalam u ba skhem ka jingmut jingpyrkhat bad uba len lade na ka bynta ka ri bad ka jaitbynriew.
U la ong ruh ba ha kine ki sngi yn ym їoh shuh ki nongїalam kiba long kum u (L) bah Hoping bad dei tang ma u marwei, u ba dei hok ban їoh їa ka nam kum u dieng Bilat ka ri Khasi. Namar naduh ba sdang haduh ba un da khlad noh um shym la shet kylla їa ka jaitbynriew. Hynrei u їeng skhem hi triang wat hapdeng ki jingtynjuh kiba shyrkhei bad ka umsaw kaba khih phaloh khamtam eh ha ka saiñ pyrthei.
U bah H.S.Thabah u la pynkynmaw ha ki nongshong shnong їa ki jingdawa jong u (L) bah Hoping na ka sorkar ba ka dei ban pynbeit noh їa u pud u sam, ka Khasi Jaiñtia state, ban weng noh їa ka Para 12 A na ka Schedule, ban weng noh їa ka Joint Cadre hapdeng ka Meghalaya bad Assam kaba dei ha ka kam pulit.
U la pynkynmaw ruh їa ki lai tylli ki kyntien shong sbai kiba u (L) bah Hoping u bat skhem triang haduh ka sngi ba un da khlad noh na kane ka pyrthei bad kita ki long, “Leh hok, Ïeng skhem halor ka nongrim khlem kylla bad ban їakhun khlem pyndem”.
