Shillong, Iaiong 27 : Ki Pulit ka North Garo Hills kila ioh pynpulom ia ka jingpyrshang rahbor bad ioh pynlait im ia uwei u nongkhaii hehspah tang hapoh shiteng kynta ba u shah rahbor.
Kat kum ka jingiathuh u Superintendent of Police ka District, kane ka jingjia kala jia ha ka 25 tarik Iaiong ha ka por 3 baje janmiet ha ka shnong Bolsong.
U iathuh ba ki Pulit ka Bajengdoba Police Station kila ioh khubor na ki nongshongshnong ka thain Bolsong halor ka jingdon ki briew ki bym lah ban ithuh, kiba rahbor ia u nongkhaii ha kawei ka kali Maruti Ertiga ML08-K-5869.
Ki Pulit ar mar kila pynieng ia ki jaka talasi ha Mansinggre bad ha ka por 3:30 baje janmiet, ia kane ka kali ha ryngkat ka thuk thuk jong une u nongkhaii bala niah da uwei na ki nongrahbor, lah ioh ban bat da ki Pulit, kiba la lap ruh ia une u nongkhaii napoh ka kali khlem kano kano ka jingmong ne jingmynsaw.
Ha ka jingtohkit, la lap ba laingut ki runar kila bat ia une u nongkhaii ha ka surok Bolsong-Agia da kaba pynbor ia u ban ieng bad hadien kila kurup jubor ia ka thuk thuk bad mobile phone, nalor ka jinglute ia ka song pisa ba T.30,000. Kine ki runar kila patan jubor ia u hapoh ka kali katba uwei pat ula niah ia ka thuk thuk. Une u nongkhaii ula ioh hylla, kaba la iohsngew da ki paidbah kiba la pyntip pat mar mar sha ki Pulit.
Kine ki lai ngut ki nongrahbor ki kyrteng u Tenggra Ch. Marak alias Togan (36), ba na South Garo Hills, Dipon D. Sangma (38), na West Garo Hills bad u Lovingson R. Marak (33), uba dei hi na West Garo Hills.
Ha ka jingtohkit, u Tenggre Marak ula kam ba u don jingiadei bad ka seng bala ai kyrteng ka United Garo People’s Forum, watla ki pulit kim pat pynthikna kane ka seng ka dei kaba kumno.
Ki pulit kila register ia ka case ha Bajengdoba Police Station ha ki kyndon bapher bapher ka Bharatiya Nyaya Sanhita (BNS) bad ka jingtohkit mynta kala iaid shakhmat.
