Shillong, Iaiong 24 : U MLA ka Mawsynram Bah Olan Sing Suin, ha ka sngi Thohdieng, ula pyntip ba ka jingpyntrei ia ka surok Phlangwanbroi-Ranikor ba T.265 klur kala sdang mynta bad ka jingpom khyndew ka la iaid shaid shaid.
“Ka surok kaba ngi la ioh ia ka jingbei tyngka ba T.265 klur ka dei na Phlangwanbroi sha Ranikor,kaba iasoh pat bad ka State Highway” ong u Bah Suin.
U bynrap ba ka jingpyntrei ia kane ka surok kala iaid bha ha kaba ki machine kila don ha kylleng ki bynta jong ka surok. “Nga kyrmen ba shisien ba la pyndep ia kane ka surok, kan sa don ka jingkylla ha ka thain jong ngi” ula ong.
U MLA u pyntip ba kane ka surok ba 47 km kan dei ka surok intermediate bad ka jingiar kan long kumba 55 meter.
“Na kane ka surok, T.265 klur la mang kat kum ka tender, lait noh ka jingkieng Umpung namar ia kane ngin hap ban thung consultant ban design bad tei ia ka jingkieng, bad ia kane ruh ngin sa pan pisa na ka World Bank” ong u Bah Suin.
Halor ka bai jaka, u Bah Suin ula ong ba ym donkam siew bai jaka satia sha ki trai jaka. “Ia kane ka surok ngim donkam ban siew bai jaka sha ki trai jaka namar nga iohi ba kane ka surok ka dei kaba biang eh ba ngin ioh” ula ong.
“Ki trai jaka kila dep iapynbeit lypa bad ka PWD ba kila ai ei sngewbha ia ka jaka bad kam don jingeh satia ban pynheh ia ka surok” ula bynrap.
