Shillong, Iaiong 22 : Ka Iingkashari Meghalaya High Court ha ka sngi Ba-ar, kala shim mukotduma suo motu halor ka jingkhaii beain ia ki maw bad kiwei ki marpoh khyndew sha khappud Bangladesh, bad pynmih ruh ia ka jingbthah ba shipor ban pynthikna ba ym dei ban don ki kali kit marpoh khyndew kiba iaid khlem ki kot ki sla kiba biang.
Ka Division Bench ka Chief Justice Revati Mohite Dere bad Justice HS Thangkhiew kala register PIL halor ka shithi ba 15 tarik Iaiong 2026, ba pynpaw ia ka jingsngew ba kan don ka jngktah kaba jur namar bun ki kali heh, kynthup ki trok kit mar bad ki trok dumper kila khaii maw bad kiwei ki marpoh khyndew sha khappud Bangladesh khamtam na ka surok National Highway-206, kaba pynhein ia ka ain.
Ha ka jingbthah ba shipor, ka Iingkashari kala hukum ia ki bor ba dei khmih ba kin pynthikna ba ym dei ban don ki kali kiba iaid lyngba ki Land Custom Station bad ka khyrdop talasi ka Tnad Forest khlem ka Mineral Transport Challan kaba treikam bad kiwei kiwei ki kot ki sla kiba donkam, kiba long ruh kat kum ki nombor kali jong ki trok.
Ki kali kiba la shem khlem ki kot ki sla kiba biang, dei ban kurup ha ryngkat bad ki marpoh khyndew, kat kum ka ain, ong ka Iingkashari.
Kala bthah ruh ba ki kali ba khaii ia ki marpoh khyndew ki dei ban don ruh ia ki fitness certifictate bad ki PUC ba treikam bad bthah ia ki borkhmih ba kin pynlong ia ka jingtalasi ban pynshisha ba ki marpoh khyndew ki dei kiba la tuh tang na ki jaka ba don licence.
Lah hukum ruh ban bud pyrrkhing ia baroh ki Ain, ki rules bad ki kyndon ba iadei bad ka jingkhaii ia ki marpoh khyndew.
Ka Iingkashari kala pynpaw ba ka shithi ba kynnoh khaii ia ki maw bad kiwei ki marpoh khyndew kila jia khlem da iaid kat kum ki lynti ba dei bad ba pynkhein ia ki ain, bad ba ki kali kiba khaii ia ki maw bad ki marpoh khyndew ki dei ki bym don satia ia ki nombor plate.
Ha kane ka shithi lah ai lang ruh ia ki dur bad ki video kum ki sakhi.
Ka shithi ka iathuh ruh ia ka jingsngewkhia haba iadei bad ka jingkynnoh tih beain bad khaii beain ia ki marpoh khyndew, kaba la pynjulor iaka surok paidbah namar ka jingiaid ki kali heh, kaba ktah jur ia ka jingim ki trai shnong bad pynjot bad pynjulor ia ka mariang, kaba ym lah satia ban siew pat ha kano kano ka rukom.
“Ka jingpynpaw bala pynsngew ha kane ka shithi ki dei kiba lah ban iohi bad kiba shisha” ong ka Iingkashari ha ka hukum.
Kala pynpaw ba ka jingtih par ha ka jingshisha ka dei ban pyrrkhing na ki jaka kiba idon jingktah (50 meter na ki shnong,ki highway bad ki tyllong um) bad ki donkam ia ka jingbit n aka Forest/Wildlife ha ki jaka bala ithuh kum ki khlaw.
“Ka dei ka kam kaba sngewkhia jur ba la shah ia ki trok/dumper ba kin iaid khlem ki nombor kali lane khlem da talasi ia ki kot ki sla kiba donkam ban kit ia ki marpoh khyndew” ong ka hukum.
Ka Iingkashari kala hukum ban pynlong mamla ia kiba bun ki kynhun, kynthup ka Sorkar Jylla, ka Tnad Mining & Geology, Directorate of Mineral Resources, Tnad Transport, Tnad Forest, ki Bor District bad Pulit, ka Meghalaya State Pollution Control Board, Tnad Revenue & Taxation, ka Sorkar India, Commissioner of Custom, Ministry of Environment, Forest and Climate Change bad ki Border Security Force. Lah phah ruh ia ka jingpyntip sha baroh kine ki kynhun.
Ka Iingkashari kala bthah ia u Advocate General ba un shim jingbthah haba iadei bad ka policy bad n mynta ha kaban khaii ia ki marpoh khyndew, khamtam u mawshun, haba shimkhia ia ka jingktah ba ka jingtih ia une u mawpoh kyndew kan long ia ka mariang, ka bym lah satia ban iapein.
