Tynruh ka Sorkar ia ka Electoral Roll tang ki ST ha ka elekshon GHADC ban pynkhlain iaka 6th Schedule : CM

Shillong, Iaiong 21 : Ka Sorkar Jylla kala shim ia ki sienjam ban wanrah ia ka rukom thep vote kaba pynshong nongrim tang ha ki trai muluk na ka bynta ka Garo Hills Autonomous District Council (GHADC), kynthup ka Electoral Roll ba tang ki Scheduled Tribe, ban pynskhem ia ka synshar ki trai mulul ha ki jaka Sixth Schedule.

Kane ka sienjam ka dei kaba thmu ban pynskhem ia ka jingkut jingmut ha kaban iada ia ka hok, ka jingithuh kyrpang bad ka jingsynshar laitluid jong ki jaidbynriew trai muluk ka Jylla.

“Da ki phew snem, ka jingdawa ban iada ia ka elekshon GHADC kala suhthied ha ka jingangnud jong ki jaidbynriew trai muluk” ong ka kyrwoh bala pynmih ha ka sngi Ba-ar.

Kala pynpaw ba ka jingtyrwa ia ka Electoral Roll tang jong ki ST ka thmu ban iada ia ka jingdon paid bad ka lawei jong ki riewlum bad iada iaki jaka ki riewlum, da kaba pynkhlain ia ki kyndon die jaka, ban pynthikna tang ki nongmihkhmat riewlum kin synshar bad iashimbynta ha ki kam jong ka synshar khadar ha ki jaka ba hap hapoh ka Sixth Schedule.

“Da kaba pynthikna ba tang ki nongthep vote Scheduled Trive ki iashimbynta ha ka elekshon GHADC, ka Sorkar ka pynskhem ia ka jingthmu jong ka Riti Synshar ba ka synshar khadar ha ki jaka riewlum ka dei ban don ia ka jingkitkhlieh tang ia ki jaidbynriew trai muluk, ka ban ai jingiada ia ka hok tynrai, ka khyndew ka shyiap bad ki bor synshar nala tynrai” ong ka kyrwoh.

Ka bynrap ba kane ka sienjam kan wanrah biang ia ka “jingmut jong ka Sixth Schedule jong ka Riti Synshar ka Ri India, kaban pynthikna ba ka Synshar khadar ia ki jaka ki riewlum ka dei ban neh beit ha ka kti jong ki nongmihkhmat trai muluk”.

U Myntri Rangbah ka Jylla Conrad K Sangma ula ong ba ka jingthmu ba kongsan eh jong ka Sorkar ka long ban pynthikna ba ka synshar khadar, ka jingthaw policy bad ka jingpyniaid ia ki kam kan dei kaba la buh beit da ki paidbah kaba ka dei ban shakri.

U Conrad ula iasaid man ka por halor ka jingiada ia ka hok ki trai ri trai muluk lyngba ka jingiakren kaba tei bad ki bor ka ain.

Ula pynskhem biang ia ki paidbah ban burom ia ka rukom iaid ka synshar paidbah bad ban buh hakhmat eh ia ka Jaidbynriew bad ka bha ka miat ka Jylla, haba iatreilang ban wanrah pat ia ka jingshongsuk shongsain.