Tura, April 19: U Myntri Rangbah ka Jylla u Conrad K. Sangma ha ka sngi Saitjain, ula buh ia u mawnongrim ban tei ia ka multi-facility building ha Dakopgre ha West Garo Hills kaba kot T.52 lak, kaba long ka projek kum shi bynta ban pynkylla ia ka Tura kum ka sor kaba kongsan bad ka shlem jong ka jaka jngohkai hashwa ban pynlong ia ka National Games ha u 2027.
Ia kane ka projek la bei tyngka lyngba ka Chief Minister’s Special Development Fund (CMSDF) bad ka Meghalaya Basin Development Authority (MBDA), ka dang pynkhreh ban tei ia ka multi-purpose ban plie lad ha kaban tei ia ka roi ka par jongki samla, ka jingai jinghikai pyntbit bad ki kam ban leh ha ka imlang sahlang.
U Sangma ula ong, ba kane ka sienjam ka pyni ia ka jingpynleit jingmut ka sorkar ia ki jingtei ha ki shnong ki thaw bad kiba iadei bad ka imlang sahlang. “Ha ki 8 snem kiba la leit, ngi lah trei kum ka kynhun ban wanrah ia ki jingkylla kiba kongsan. Mynta kane ka jingiaid shakhmat kadei kaba la sdang ban ioh ha kylleng jong ka Tura,” ula ong.
Haba pyniasoh ia kane ka projek bad ka jingiaid ha ka lynti jong ka roi ka par, u Myntri Rangbah ula pynpaw ba ki jingtei kiba donkam ha kylleng ka Dakopgre, kaba kynthup ia ka P. A. Sangma Integrated Sports Complex, ka Additional Secretariat bad ka jingtyrwa ban tei ia ka Five-Star Hotel da ka jingthmu ban kyntiew ia ka kam jngohkai.
Ula pynbna ruh ia ki kam ban leh na ka bynta ban pynitynnad ha shi lynter jongka P.A. Sangma Road naduh na Araimile Junction shaduh Ballongre ha kaba yn buh ia ki Street Light, CCTV, ka jingpynwandur bha ia ki jaka bad ia ki jaka kiba jyrngam na ka bynta ki paitbah.
Ha kaba iadei bad ki lad pyniasoh, u Sangma ula kdew ia ki kam kiba la iaid shakhmat ha Baljek Airport bad ka banjur ba kine ki projek kin nang kyntiew ia kane ka thain ha ka jingdon ia ki jingtei ki bapher bapher bad kan kyntiew ruh ia ka kam jngohkai bad thaw ia ki lad ban kamai jakpoh.
Ula kyntu ia baroh kiba donbynta lang ban pynthikna ba ka jingtei kadei ban iaid bad bud ia ka kyrdan bad ula kyntu ba dei ban pyndonkam katba lah ia ki jingtei kum ki shlem jong ka imlang sahlang bad ula ai jingmut ban ai jaka ban ioh ban ialehkai, ka tem ka put, ki jaka ai jinghikai bad ki prokram ban ban tei ia ka sap ka phong jong ki samla bad ki kynthei kynthup ia ka kam suhjain, thain jingthain bad ka food processing ne jingpynmih ia ki jingbam bapher.
U Sangma ula pynpaw ruh ba ka sor Tura ka long kaba kongsan bha na ka bynta ka 2027 National Games, ha kaba kan pynlong ia ki 6 tylli ki jait jingialehkai ha ryngkat bad ka jingpynhap pyrda ia kane ka lympung iakob ialehkai.
“Kane kan dei kawei na ki rynsan iakob kaban heh tam ha ka histori jong ka jylla bad ka Dakopgre kan leh ia ka bynta kaba kongsan bha” ula ong, bad ka kyntu ia ki nongshong shnong ban iashimbynta shitrhem ha kaban pynkhreh ia kane ka thain.
Ha kane ka prokram la wan ban iashimbynta na ki nongialam shnong, ki dkhot nongshong shnong, ki nongmihkhmat na ki Balang bad la buh jingduwai ba kan don ka jingseisoh ha kaban tei pyndep ia kane ka projek.
Nalor kane, la pynlong ruh ia ka jingpyninam ia ka kolshor bad ka jingkren na ki nongialam kaba la pynlong ia kane ka jingialang bad pyni ia ka jingai jingkyrshan kaba khlain na ka bynta katei ka sienjam.
