Shillong, Iaiong 17 : U President ka Hill State People’s Democratic Party Bah KP Pangniang, ha ka sngi Palei u pyntip ba ka party kan dang ban shim rai ban mih iakhun ha ka elekshon shiteng samoi jong ka Shillong Lok Sabha bad yn sa shim rai ia kane hadien ka jingialang jong ka Central Executive Committee.
“Ngin sa khot ia ka Central Executive Committee ha ki sngi ban sa wan bad ban shim rai halor kane. Ia mynta hi, ngin dang ban shim ia kano kano ka rai” ong u Bah Pangniang haba iakren bad ki nongthoh khubor.
Halor ka Women’s Reservation Bill, ula pdiang ia ka sienjam jong ka Sorkar Pdeng ban pynpaw ia ka jingkyrmen ba yn pyntreikam lang ha Meghalaya.
Haba kylli halor ka jingiakhih pyrshah ia ka project tourism ha dewlynnong Lumpongdeng, u Bah Pangniang ula ong ba ka rai jong ka Sorkar ban nym tei jingtei ha dewlynnong ka dei ka dak ba sngewtynnad.
“Ha ka jingshisha, ka Sorkar kala shim ia ka rai ban nym tei satia ia kano kano ka jingtei ha dewlynnong Lumpongdeng. Ngi sngew ba kane ka dei ka khubor kaba bha ba ka Sorkar kala ai haba iadei bad ka jingiakhih jong ka Green Tech Foundation” ula ong.
