Ai jingiaroh ka HSPDP ia ka Sorkar ba ithuh “Official Language” ia ka ktien Khasi bad Garo

Shillong, Iaiong 17 : Ka Hill State People’s Democratic Party (HSPDP) ha ka sngi Thohdieng, kala ai jingiaroh ia ka rai jong ka Sorkar Meghalaya Democratic Alliance (MDA) ba ialam da u Conrad K Sangma, ban ithuh ia ka ktien Khasi bad Garo kum ka Official Language.

Kala pynpaw ba kane ka dei ka rai ka ban pynkhlain ia ka jingdawa ban pynrung ia kine ki artylli ki ktien ha ka Eighth Schedule ka Riti Synshar ka Ri.

“Ngi ai khublei ia u Myntri Rangbah ka Jylla bad ka Kynhun Myntri namar ka jinglah jong u kum u nongialam, ula shim ia kane ka rai ban ithuh ia ka ktien Khasi bad Garo ha Meghalaya” ong u President ka HSPDP Bah KP Pangniang haba iakren bad ki nongthoh khubor.

Ula pynpaw ba ha u snem 2018, ka Sorkar MDA da kawei ka sur kala mynjur ia ka resolution ha IIngdorbar Thaw Ain ba kyrpad ia ka Sorkar Pdeng ban pynrung ia kine ki artylli ki ktien ha ka Eighth Schedule.

“Ka rai jong ka Sorkar Jylla ban ithuh ia ka ktien Khasi bad Garo kum ki official language kan phah ia ka khubor kaba khlain sha ka Sorkar India ba kan ai jingithuh bad kynthup noh ia kine ki ktien ha ka Eighth Schedule jong ka Riti Synshar ka Ri” ong u Bah Pangniang haba kyrpad ia ka Sorkar ba kan buddien tyngeh ia kane ka kam bad ka Sorkar India.

Haba pynpaw ba ka jingithuh ia kine ki artylli ki ktien ka dei ka jingdawa bala slem jong ka party, u President ka HSPDP ula ong “Ngi la pynpaw ia kane ka mat ha ka manifesto jong ka party naduh ka por u Bah Hoping Stone Lyngdoh kum u nongialam ka party tad haduh mynta. Ngi la dep aiti ia ka jingdawa ban pynkylla ia ka Associate Official Language sha u Myntri Rangbah ka Jylla ha ka 14 tarik Nailar 2024 bad 24 tarik Naitung 2025. Ngi la pynpaw balei ba ngi donkam ban ithuh ia kine ki ktien”.

Kum ka party kaba iatreilang ha ka Sorkar, u Bah Pangniang ula ong ba ka HSPDP ka sngewtynnad shibun eh ba la shimkhia ia kane ka mat.