Shillong, Iaiong 17: Ki Doctor hynne ka janmiet kila rah noh ia u Chairman ka Green Tech Foundation (GTF) Meghalaya u Bah H Bansiewdor Nonglang sha Civil Hospital Shillong.
Kane ka wan hadien ba ki Doctor kila eksamin ia u Bah Bansiewdor haka jaka ba u pynlong ka jingshah thngan ha Madan Malki.
U Bah Bansiewdor ula sdang iaka jingshah thngan khlem pud sngi naduh 8 tarik Iaiong ha Madan Malki ban pyrshah iaka project jong ka tnat Tourism ha dewlynnong Lumpongdeng Umiam.
Hashuwa ban rung sha Emergency Centre jong ka Civil Hospital u Bah Bansiewdor ula ong “Wat khuslai naka bynta jong nga, khuslai naka bynta ka Umiam bad Lumpongdeng, lada ngim lah ban ioh biang iaka Umiam bad Lumpongdeng, kan dei ka jingialeh ba rem jong ka jaidbynriew, lada ngi jop, ngin long trai biang iaka Umiam bad Lumpongdeng”.
U Bah Bansiewdor ula ong ba kum u nongialam ula leh katba lah hynrei ula ong ba ki paidbah bad nongialam ka GTF kim shah shuh ia u ban shong shah thngan ha Malki.
“Nga tharai phim kwah baka jingiap jong nga kan dei ka jubab iaki mynder bad ki myndie ri kiba don ha Secretariat. Phi kwah baka jingjop jong ngi kan dei hi ka jubab” ula ong.
“Pynjur ka jingduwai bad leh iaka ba donkam, pyndap iaka madan Malki” ula bynrap.
