Nongpoh, Iaiong 16 : Ka Synjuk ki Rangbah Shnong ka Ri-Bhoi District, ha ka sngi Palei, kala dawa ia ka Tnad Pulit ba kan khang noh ia ka khyrdop jong ki Pulit bala buh ha National Highway-06 ha ka shnong Quinine.
Ia kane ka jingdawa la pynsngew hakhmat u Superintendent of Police ka District ha ka jingiakynduh hadien ba wai ka jingialang jong ka Executive Committee ka Synjuk.
Haba kren sha ki nongthoh khubor, u President ka Synjuk Bah BB Makdoh ula iathuh ba ka jingiakynduh ia u SP ka long halor ka jingujor ki paidbah ba ka khyrdop ki Pulit ha Quinine kala pynthut ia ka leit ka wan ki riew paidbah.
U iathuh ba kat kum ka jingujor, ka jingdonn kane ka khyrdop kala pynwit ia ka leit ka wan ki kali naduh ka por mynstep bad ka wanrah ruh ia ka jingdheng kali. U ong ba ha ka por mynmiet, ka ju mih ka jinghylla da ki ktien khlem akor kaba pynsyier ia ki nongleit nongwan bad khamtam eh ia kito kiba sah marjan, nalor ka jingleit shabar pathar namar ka jingbym don ka jaka leit bar ba thikna.
U Bah Makdoh u pyntip ba ka Synjuk kala buh jingkylli ia ka jingmut ban buh ia katei ka khyrdop, ka leh aiu kane ka khyrdop, ka talasi ia kiei.
U ong ba lada ka dei ka khyrdop ban talasi ia ki mynder, ki tnad Pulit kala dei ban buh ia ka ha Byrnihat na Khanapara ym ha Quinine. Namar kane, kala dawa ban khang noh haba maham ba lada ym khang ne weng, ka Synjuk kan sa ujor sha ki bor ba halor.
