Nongpoh, Iaiong 10 : Ki san tylli ki Dorbar Shnong kiba don sawdong ka pung Umiam, kila pynpaw ba kim don satia ia kano kano ka jingpyrshah halor ka jingthmu ban tei ia ka 5-star hotel ha ka kyrteng ka Taj Umiam Resort & Spa ha Umiam bad ong ba kane ka resort kan ym don jingktah satia ia ka dewlynnong Lumpongdeng.
Kine ki Dorbar Shnong ki kynthup ia ka Shnong Mawlyndep, Umbir, Umñiuh, Umiam bad Umsaw. Ia kane la pyntip da u Deputy Commissioner Abhilash Baranwal, ha ka sngi Thohdieng hadien ka jingialang jong ka District Tourism Promotion Society (DTPS).
Ia kane ka jingialang la lum halor ka jingpyrshah jong ki kynhun bapher bapher ban tei ia ka Resort ha dewlynnong Lumpongdeng khamtam ka Green Tech Foundation kaba la rai ban pynlong da ka jingshah thngan ba khlem pud.
Ha kane ka jingialang la wan ban iashimbynta da ki nongmihkhmat na ka Meghalaya State Pollution Control Board (MSPCB), ka Tnad Tourism, ka Tnad Forest bad ki Nongialam Shnong jong kitei ki san tylli ki Shnong.
Haba kren sha ki nongthoh khubor, u Deputy Commissioner u iathuh ba ka jingialangkala iathir sani halor ka jingthmu jong ka Sorkar ban kyntiew ia ki kam jngohkai da kaba tei ia ka Taj Umiam Resort & Spa.
U iathuh ba kat kum ka jingiateh soskular bad ka Umiam Hotels Pvt Ltd, ka jingtei ia kane ka 5-star hotel kan long tang ha ka jaka ba ieng ka Orchid Lake Resort ba mynta bad kan ym don satia kano kano ka jingtei kaba neh shirta ha dewlynnong Lumpongdeng.
U iathuh ba ha ka jingiakren, ki Nongialam jong ki San Shnong ba ker sawdong ia ka pung Umiam, kila pynpaw ba kim pyr shah satia ia kane ka project ne ka jingthmu jong ka Sorkar bad kren shai ruh b aka project hi kan ym don jingktah eiei ia ka dewlynnong.
Hynrei ula ong ba ki Dorbar Shnong kila pynpaw pat ia ka jingangnud ba ka Sorkar ka dei pat ban pyrkhat lang ia ki trai shnong ka thain da kaba pynthikna ban aikam aijam ia ki samla trai shnong ha kane ka resort.
