Shillong, Iaiong 9: U Myntri Rangbah ka Jylla u Conrad K Sangma hynne ka sngi Palei, ula pynshai ba ka sorkar jylla kala khang ban shna ia kino kino ki jingtei kiba neh pura ne Permanent ha Lumpongdeng Island ne dewlynnong Lumpongdeng.
Kane ka jingpynshai u Myntri Rangbah kala wan hadien ba kala don ka jingiakhih da kaba shah thngan kaba la sdang da ki nongialam jongka Green-Tech Foundation hakhmat jong ka Secretariat kiba la dawa ba ym dei ban leh ia kino kino ki projek jong ka kam jngohkai ha Lumpongdeng Island.
“Nga kwah ban shim ia kane ka kabu ban pynshai ia baroh ba ha ka jingiatehkular kaba la dep ban iasoi, ka sorkar bad ka tnad jngohkai kala dep ban kren shai ba kan ym don kano kano ka jingtei kaban neh pura ne Permanent kaba lah ban leh ha katei ka dewlynnong” ong u Sangma.
Ha kaba iadei bad ki jingsngewkhia ba katei ka dewlynnong kan shah pynkylla noh kum ka jingtei maw, u Myntri Rangbah ula ong, “Ka jingsngewkhia ka jongki ba katei ka dewlynnong baroh kawei yn pynkylla long noh da ki jingtei da ki maw ka long kaba bakla. Ka sorkar kala dep ban kren shai ha ka jingiatehkular ba ym dei ban don kano kano ka jingtei kaba neh pura kaba yn shah ban leh hapoh katei ka dewlynnong”.
U Sangma ula batai ba tang ki jingtei ki bym neh shi rta kidei kiba yn shah ban pynitynnad ia katei ka jaka.
“Ki jingtei kiba shipor, Shamiana, Pandal bad ki Stall kiba shipor, kiba lah ban weng noh shisien ba la kut ne dep ka prokram kumba ngi leh ha Ward’s Lake… kiban neh tang ha ka shi taiew ne shiphew sngi bad yn sa weng noh ia ki” ula ong.
“Kumta kan ym don kano kano ka jingktah ia ka dewlynnong ne ia ka jinglong jingman jong ka jingdon jingem ki jingthung bad ki jait jingim ha katei ka jaka”.
Ula bynrap ba watla ki ain ki kanun kiba iadei bad ka mariang kila shah ban tei ia ki jingtei ha ki katto katne ki bynta ha kaba la ioh ia ka jingbit na ka tnad Forest, hynrei ka tnad Tourism kala iengskhem ha la ka nongrim.
“Watla ki ain kiba iadei bad ka mariang kila shah, ka tnad Tourism kala iengskhem ha ka nongrim bad buh ha ka jingiatehkular ba ym dei ban don kano kano ka jingtei kaban neh shi rta kaban shah ban leh ha katei ka dewlynnong” la ong u Sangma.
“Nga kyrmen skhem ba kane ka jingpynshai ka barit, ia ka jingsngewkhia jong ki nongshong shnong yn sa shimkhia” ula bynrap.
