Shillong, Iaiong 9: Ka All Jaintia Muster Roll Workers and Labour Union kala pynsangeh noh ia ka jingiakhih hadien ka jingwan iakynduh ia u Myntri Rangbah ka jylla u Conrad Sangma, uba la pynthikna ia ka kynhun ba ka sorkar kan pynbeit ryntih noh bad pynthikna ba baroh ki tnad sorkar kin pyntreikam ia ka hukum ban pynbeit thymmai ia ka Variable Dearness Allowance (VDA) arsien ha ka shi snem.
Haba iakren bad ki nongthoh khubor hadien ka jingialang ha ka sngi Palei, u Adviser ka Union Bah Khroo L Pariat ula ong, “Ka jingialang bad u Myntri Rangbah kala long kaba biang bha. Ula pynthikna ia ngi ba yn sa pynbeit ryntih ia baroh ki tnad hapoh jong ka Sorkar Meghalaya ban bud ia ki jingbthah jong ka sorkar. Ula kubur ba kala don ka jingduna bad ka jingbym biang ka rukom treikam hynrei mynta un sa pynthikna noh ba ki khlieh jong baroh ki tnad kin hap ban bud ryntih ia man la kawei pa kawei ka jingbthah kaba pynmih”.
Ka Union kala iai dawa ba dei ban pyntreikam ia ka jingpynbeit thymmai noh ia ka VDA, kaba la pynkup bor da ka Minimum Wages Act kaba dei ban pynkylla arsien ha ka shi snem ha ka 1 tarik u Iaiong bad 1 tarik u Risaw.
U Myntri Rangbah ula pynthikna ba yn sa pynmih ia ka hukum ban pynbeit thymmai ia ka VDA ha kine ki sngi ban wan.
U Bah Pariat ula ong, “U Myntri Rangbah ula mynjur ruh ban khmih bniah ia ka mat kaba dei bad ka jingshongthait na ka kam namar ba kadei ka mat kaba pynmih ia ka jingbym shai ne pynklumar ia ki jingmut jingpyrkhat. Ula bthah ha ki ophsiar ban buddien ia kane ka mat jingdawa bad yn sa lum ia ka jingialang hashwa ban kut u Iaiong.
Ka Union kala ai por ia ka sorkar haduh ban da kut u Iaiong ban pyntreikam ia katei ka hukum bad lada jia ba ka pulom, kin pynlong da ka jingiakhih kaba heh ha baroh ki District Headquarter jong ka jylla Meghalaya.
“Ngi ngin iai ap shwa ia ka jingpyntreikam ia katei ka hukum hapoh jong une u bnai. Lada u Myntri Rangbah ym pyntreikam ia ka, ngi ngin pynlong ia ka jingiakhih kaba heh” la maham u Bah Pariat.
 arsien ha ka shi snem.){kind=link}