Shillong, Iaiong 09 : Ka Green Tech Foundation Meghalaya ha ka sngi Palei, kala pynlong ia ka jingia khih hakhmat ka Secretariat bad pynbna ban pynlong ia ka jingshah thngan ba khlem pud,ka ban trei kam hi noh mardor, ban pyrshah ia ka jingbym lah ka Sorkar ban pynsangeh ia ka project Tourism ha dewlynnong Lumpongdeng, ha Pung Umiam.
“Ngim shym la pynmih kano kano ka jingkulmar. Ngi ieng ban pyrshah jur ia ka jingpynjot ia ka mariang ha dewlynnong Lumpongdeng” ong u Chairman ka Foundation H Bansiewdor Nonglang haba ban jur ba ka kynhun kala dep ban thoh sha ka Sorkar Jylla bad iakynduh ruh ia ki bor ba dei khmih.
U Bansiewdor ula buh jingkylli ia ka jingkam ki bor Sorkar ba ki nongiakhih kila pynthut ia ka leit ka wan ki kali bad ong “Kumno ki lah ban kynnoh ia ngi ba pynthut ia ka jingiaid ki kali? Ki bud ki ieng hangne bad watla katta kila kynnoh ia ngi”.
Ka GTFM ka pyrshah ia ka jingshna ia ka Taj Umiam Resort & Spa ha dewlynnong Lumpongdeng, haba pynpaw ia ka jing sngewkhia halor ka jingktah jong ka project ia ka mariang.
“Ngim pyrshah ia ka project,hynrei ngi ong ban pynlait ia ka dewlynnong Lumpongdeng na ka project namar ka dei kaba don hapdeng eh jong ka pung Umiam bad kumno phin rah ia ki kor ba khia bad pynjot ia ka dewlynnong”bynrap u Bah Nonglang.
U Secretary General ka GTFM Ritre Lyngdoh ula ong “Ngi la phah jingthoh sha ka Sorkar ba dawa ban pynkut noh ia ka project, ngim shym la dawa ban pynsangeh ia ka project ha baroh 66 acre hynrei tang 36 acre kaba kila ai ha dewlynnong Lumpongdeng”.
U Nonglang ula maham ba ka jingshah thngan kan iai bteng watla u shah kem ne poi sha along.
“Nga la ong ia ki Pulit ba watla phi kem ia nga bad phah ia nga sha along, ka jingshah thngan ba khlem pud kan bteng. Lada ki kem ia ngi mynta ka sngi, ka jingshah thngan ba khlem pud kan sdang ha along” ula ong.
