Shillong, Iaiong 07 : U Myntri ka tnad Pule Puthi Bah Lahkmen Rymbui ula bthah ia u Executive Member ka KHADC bad MDC ka Mawthadraishan Bah Powell Sohkhlet ba un mang pisa na ka skhim MDC lajong ban shna pynbha bad maramot ia ki iingskul, haba kyntait ia ki jingkynnoh ba leh shiliang ha ka jingsam ia ka song pisa maramot iingskul.
“Ngam thikna mano ba pynmih ia kane ka jingkynnoh bad ha kano ka nongrim, kumta ngam lah ban jubab ia ka. Hynrei, naduh u 2018, ngi la buh hakhmat eh ban maramot bad shna pynbha ia ki iingskul, kum shibynta na ka mishon jong ngi ban ai ia ka pule dangle ba bha tam sha ki khynnah skul. Mynta u snem, ngi la mang ban maramot haduh 186 tylli ki skul, kynthup kiba kiba la wanrah ia ka arts stream ha ki Higher Secondary School” ong u Bah Lahkmen haba iakren bad ki nongthoh khubor ha ka sngi Ba-ar, haba jubab ia ki jingkynnoh u bah Powell.
U Bah Rymbui ula ai jingmut ba u EM ka KHADC Bah Powell Sohkhlet u dei ban pyndonkam iala ka skhim MDC na ka bynta ban maramot ia ki iingskul haba ong “Kum u MDC, u ruh u don la ka jong ka skhim ban maramot iingskul. Kumta, u dei ban mang kham bun ka pisa nala ka jong ka skhim”.
U Myntri ula iathuh ia ka jingpyrshang jong ka Sorkar da kaba ong, “Ngi la mang 186 tylli ki skul hapoh ka Mission-IV, bad kane kan dang bteng. Ngi la pyrshang kat kaba lah, hynrei ki kam kila nang iaid”.
U Myntri ula ban jur ia ka jingdonkam ban iatreilang da kaba ong “Nga kyntu ia baroh ki kynhun ba don bynta, ban iasnohkti lang bad ka Sorkar. Ha ka jaka ban shu kynnoh, to ngin ai jingiaroh ruh ia ki sienjam bala shim da ka Sorkar bad ban iatreilang na ka bynta ka jingmyntoi ki khynnah skul”.
Ula ai nam ia ka jinglong nongialam u Myntri Rangbah ka Jylla Conrad K Sangma bad ong “Lada ym dei namar u Myntri Rangbah, ngin ym kynnoh ia kane. Ula buh ia ka pule puthi hakhmat eh bad ngi la iohi ia u soh”.
U Bah Lahkmen ula kyntu ia ka jingiatylli bad ong “To ngin kiar na ka jingiakdew kti bad iatreilang na ka bynta ka kam pule puthi ha ka Jylla. Ka jingmyntoi ka long na ka bynta ki khynnah skul, ym ki riew shimet”.
