Nongpoh, Nailur 27: Ka Joint Action Committee jong ki saw seng ba kynthup ia ka KSU, RBYF, FKJGP bad HNYF kila rai ban pynlong da ka jingiaid paidbah bad pynbud da ka jingthang mombiti halor ka jingshah pyniap dusmon ka samla lud ha uwei u bar jylla.
Ia ka metiap jong kane ka samla lud la lap ba ka thiah lyngktar harud surok jong ka Shnong Pahamsyiem hynnin ka janmiet sngi nyngkong.
Haba kren sha ki lad pathai khubor, ka JAC kala pynrem jur ia kane ka jingjia bad dawa ia ki bor jong ka ain ban leh da kaba tyngeh ia une u runar uba shim ia ka jingim jong kane ka samla lud.
“Ka JAC ka pynpaw ia ka jingbitar kaba jur bad ka jingsngewsih kaba khraw ia kane ka jingshah bthat jingim ka samla ha u bar Jylla” ong u President ka JAC samla Baiashanlang Kharshanlor bad Secretary samla Aristonemanbha Ryndongsngi.
Kila pyntip ba ki saw seng kila rai ban pynlong da ka jingiaid paidbah ha ka 30 tarik Nailur ban pyni ia ka dak ka jingpyrshah jur ia kine ki kam bymman.
Kane ka jingiaid paidbah kan long naduh ka shnong Iewmawlong haduh Nongpoh Town Shopping Complex naduh ka por 2 baje nohphaisngi.
La pyntip ba hadien kane, yn sa pynlong ruh ia ka jingiathang mombiti kum ka dak ka jingsngew lem ia ki bahaiing hasem jong kane ka samla ka ban long hi ha Shopping Complex.
