Guwahati, Iaiong 6: U Myntri Rangbah ka Assam, u Himanta Biswa Sarma, ha ka sngi Nyngkong, u la nang pynjur ia ka jingkynthoh pyrshah ïa ka Congress bad kynnoh ba ki “kynhun social media jong ka Pakistan” ki dei kiba don ha lyndet jong ki jingkynnoh ba dang shen pyrshah ïa u bad ka tnga jong u.
U Himanta u pyntip ba ia kane ka jingkynnoh la ujor ruh sha ki Pulit bad ong ba kiei kiei kiba la kynnoh ki dei kiba la pyn man na ki kot ki slab a shu shna thok.
Haba kren sha ki lad pathai khubor, u Sarma u la kam ba ki tiar ba la pyndonkam ha ki jingialang bad ki nongthoh khubor da ki nongialam ka Congress kum u Pawan Khera ha Delhi bad u Gaurav Gogoi ha Guwahati ki dei kiba la shim na ka network jong ka Pakistan.
“Ha ka jingwad bniah jong ngi, ngi la lap ba baroh ki jingthoh ba la pyni ha ki jingïalang bad ki lad pathai khubor hynnin ka sngi la pynbiang da ka kynhun social media jong ka Pakistan,” ong u Sarma da kaba bynrap ba ki lad pathai khubor jong ka Pakistan ki la pynmih ym duna ïa ka 11 tylli ki jingïakren halor ka elekshon Assam ha kine ki 10 sngi ba la dep, ha kaba la kynnoh ba ki kyrshan ïa ka Congress ban ioh ia ka jingjop.
U la kam ba ia katei ka jingjia “kaba sngewkhia” bad u la ong ba ia katei ka kam yn sa bishar bniah da ki bor jong ka ain.“Kumno ka Pakistan ka pyrshang ban pynbor ia ka election ha Assam ban long kaba kongsan bha”, u la bynrap.
U Myntri Rangbah ka Jylla ula kyntait ruh ïa ki jingkynnoh ba la pynpaw da ka Congress ha kaba ïadei bad ka lok jong u ka Riniki Bhuyan Sharma, kaba la shah kynnoh ba ka don bun tylli ki passport bad buhrieh ïa ki jingtip shaphang ki mar ki mata. U Sarma u la ong ba kitei ki jingkynnoh ki long halor ki kot ki sla ba la shondur bad ba la thok, kynthup ïa kaei kaba u la batai kum ka “passport ba la jah” ba la pyndonkam bakla ban kynnoh ïa ka.
Halor kane, ka Riniki Bhuyan Sharma ka la ujor da ka ejahar ha ka miet sngi Saitjain.U Sarma u la ong ba katei ka case ka lah ban khring ia ki kyndon pynshitom kiba jur bha, kynthup ia ki jingkynnoh kiba iadei bad ka jingleh thok bad ki kyndon kiba iadei bad ka jingpyrshang ban pynbor ia ka jingmih jong ka election da kaba pyndonkam ia ki tiar kiba la shna thok.
“Ka jingpyndonkam ïa ki kot ki sla kiba thok ban pynkhih ïa ka elekshon ka lah ban shah pynshitom da kaba tyngeh, kynthup ïa ka jingshah set phatok shi jingim,” u la ong haba kdew sha ki bynta ba ïadei hapoh ka aiñ.
Shuh shuh u Sarma u la kynnoh ba u la don ki jingai jingmut lypa shaphang katei ka mat.“Ha ka 27 tarik u Lber, nga la pyntip sha uwei u nongthoh khubor ba kaei kaei kaba kum kane kan sa jia”, u la ong bad bynrap ba ïa kane ka kam la pyntip sha ka Sorkar India.
Haba wad ïa ka jingtip ba bniah kaba jur ïa u Gogoi, u khun jong u myntri rangbah barim ka jylla, u Tarun Gogoi, u Sarma u la buh jingkylli balei ba un “shim jingïarap na ka kynhun social media jong ka Pakistan” ban pynïahap ïa ki jingkynnoh.
