Guwahati, Nailur 27 : Ka iingbishar Gauhati High Court hynne ka sngi kala pynneh ia ka rai set phatok junom pyrshah ia u nongialam ka kynhun seng lehnoh National Democratic Front of Bodoland (NDFB-R) u Ranjan Daimary ha kaba iadei bad ki jingjia bthei bom kiba la jia ha ka snem 2008.
Haduh kumba 88 ngut ki briew kila iap bad 540 ngut kiwei pat kila ngat ha ki jingmynsaw ha ki katto katne tylli ki jingpynbthei bom kiba leh da ki dkhot jong ka kynhun seng lehnoh NDFB ha ki bynta jong ka sorbah Guwahati, Kokrajhar, Bongaigaon bad Barpeta district ka Assam kaba la jia ha ka 30 tarik u Risaw 2008.
Kham hashwa, ha ka snem 2019, ka iingbishar ba kyrpang ka CBI ha Guwahati kala rai pynrem pyrshah ia u Ranjan Daimary da kaba set phatok shi junom.
Ka iingbishar ka CBI kala pynngat ruh ia 14 ngut kiwei pat kaba kynthup ia u Daimary ha kaba iadei bad ka jingjia kaba la jia ha ka 28 tarik u Kyllalyngkot 2019 hapoh ki kyndon bapher bapher jong ka IPC.
Ha ka snem 2020 la pyllait noh ia u Daimary napoh Guwahati Central Jail na ka bynta ban iashim bynta ha ka jingiakren iasuk bad ka sorkar pdeng.
La pyllait jamin ia u Daimary da ka iingbishar Gauhati High Court na ka bynta saw taiew hadien ba ka sorkar Assam kam shym la pyrshah ia ka jingkyrpad jamin ka jong u hapoh ka iingbishar.
