Shillong, Nailur 27: U Myntri Rangbah ka Jylla ula pynpaw ba ka Sorkar kan shong bishar ia ki lad ki lynti kumno ban iarap ia ki nonghikai contract kat kum ki rules.
“Lada don ka lad ka lynti ban iarap ia ki kat kum ki rules bad ki rukom treikam kiba iaid hapoh ka tnad, ngi long kiba kloi ban bishar ia baroh kine ki kam” ong u Conrad.
“Hynrei, ka dei ka kam kaba jyrwit jyrwat namar ka sorkar kan ym lah ban shu thung kam beit beit ia ki namar kam long ruh kaba iahap ia ngi ba ki don ki rukom treikam ba ngi hap bud” ula bynrap.
Ki nonghikai contract kiba don ha ka lama jong ka Meghalaya Government Lower Primary Contractual Teachers’ Association (MGLPCTA) ki dang don hapdeng ka jingiakhih da kaba shong shah thngan mynta la bun sngi ban dawa na ka sorkar ba kan thungkam biang ia ki.
Palat 800 ngut ki nonghikai kila shah weng na ka kam hadien ba kim shym la pass ia ka Meghalaya Teacher’s Eligibility Test (MTET).
Haba kylli, u Myntri Rangbah ula ong ba ka kyntien hi ka ong ki nonghikai contract kaba mut ba ki don ha ka contract bad lah pynthymmai ia ki shisien ha ka 58 sngi.
“(Hynrei), ka rukom thung kam ia ki nonghikai ba pura ka ju don beit. Kiba bun ki nonghikai contract kiba don ha ka contract ki ju applai bad ki pass bad kila iohkam bad don ruh kiba la palat ia ka rta iohkam hynrei kim pass satia. Ki don haduh 1300 ngut ki nonghikai kiba la thungkam” ula ong.
