Shillong, Iaiong 1: U Myntri Rangbah ka Jylla u Conrad K. Sangma ha ka Sngi Balang, ula ong, ba ka jingsahteng jong ka jingtei ia ka LPG Bottling Plant mynta kala sdang ban iaid shakhmat bad la khmih lynti ba shen yn sa pyndep noh ia ka.
Haba iakren bad ki nongthoh khubor, u Sangma ula ong ba ka jingtei kala iaid shakhmat.
“Kadei kaei kaei kaba la sahteng la bun snem bha, hynrei kadei kane ka sorkar kaba la shim ia ka rai, kaba la ai iaka jaka bad mynta ka jingtei kala sdang. Kiei kiei kin shim por, phim lah ban khmih lynti ba ka jingtei yn pyndep noh mardor hi hynrei kan long pat kaba kloi. Kumta ngi khmih lynti ba yn pyndep kloi noh ia ka” ula ong.
“Lah dei ban leh ia kane naduh ki snem kiba mynshwa, watla kata ruh kam pher hynrei ngi lah shim pat ia ka rai, ngi lah pynbiang ia ka jaka bad ngi lah don ha ka khyllipmat ia kaba ngi dei ban lah ban pyndep noh ia ka” ula ong.
U Myntri Rangbah ula pyntip ruh ba kala don ka jingmad jingeh ha ka ri baroh kawei ha ka jingpynpoi ia ki Commercial LPG kiba pyndonkam ha ki dukan hynrei ka jingpyndonkam ia ki Domestic LPG kiba pyndonkam hapoh ki iing ha Meghalaya kadei kaba la pyndap pynbiang ba kala don eh tang khyndiat ka jingduna.
“Ia ki LPG kiba pyndonkam ha iing kadei kaba ngi dang lah ban pynbiang, hynrei kala don pat ka jingduna kaba tang katto katne bad kam dei satia kaba heh haduh katta katta” la ong u Sangma.
“Hynrei ha kaba iadei bad ka Commercial LPG ne ki LPG kiba pyndonkam ha ki dukan kala don ka jingduna hapoh ka ri hi baroh kawei kumta ka sorkar kala kyntiew sha ka 70% na ka dor kaba mynshwa kaba don na ka bynta baroh ki jylla. La pynkiew na ka 20% sha ka 70% bad ka jingktah jong kane kan dei kaban dang mad. Ngi khmih lynti ba ha ki sngi ban wan, ba ka jingwan pynpoi kan nang kiew bad ngi khmih lynti ba kan don noh ka jinghiar jong ka jingduna”.
Nalor ula bynrap shuh shuh da kaba ong, “Kine kidei khyndiat na ki jingtynjuh bad kumba phi tip jan kumba 90% jong ka jingdonkam ia ka LPG ka wan na kane ka thain bad ka iaid lyngba ka Strait of Hormuz bad kumta, ka jingtynjuh ka don” bad ka ong “Ha kajuh ka por, ka Sorkar India kala ialeh ban pynbiang ha ki kyrdan ki bapher bapher ban pynduna ia kane ka jingthud kaba ki paitbah kila mad”.
