Shillong Nailur 26: U Myntri Rangbah ka jylla u Conrad K Sangma, hynne ka sngi nyngkong ula pynpaw ba un sa shimkhia ban iakren bad ka Sorkar Pdeng ha kaba iadei bad ka rai ban weng noh iaki jingioh jingmyntoi kyrpang jong ki ophisar All India Services (AIS) kiba dei naka thaiñ shatei lam mihngi.
“Ngan shimkhia ia katei ka mat bad ka Sorkar Pdeng” ong u Conrad Sangma haba iakren bad ki nongthoh khubor.
Dang shen, ka Sorkar Pdeng kala weng noh ia ki jingioh jingmyntoi kynthup iaka jingioh iaka pisa Allowance jong ki ophisar All India Services (AIS) kiba dei naka thaiñ shatei lam mihngi.
Ki ophisar AIS ki kynthup iaka Indian Administrative Service (IAS), Indian Police Service (IPS) bad Indian Forest Service (IFS) kiba kynthup ia ki Joint Cadre jongka Assam-Meghalaya, Sikkim, Nagaland, Tripura bad Manipur kila ioh iaka Special Allowance kaba long sa 25% na ka tulop kaba ki ioh bad kiwei kiwei ki jingmyntoi haba ki shakri hapoh ka thaiñ shatei lam mihngi jong ka ri.
