Shillong, Nailur 26 : U Myntri Rangbah ka Jylla Conrad K Sangma hynne ka sngi nyngkong, ula ban jur ba ka jingkylli ban pynduh pyndam noh ia ka Meghalaya Regulation of Gaming Act, 2021, kam mih satia.
Haba iakren bad ki nongthoh khubor, u Conrad ula ong ba ia kane ka Ain la wanrah khnang namar ki don shibun ki jaka khalai kiba treikam haduh mynta khlem ki licence kum ki jaka lehkai jackpot bad kiwei kiwei ruh. Kine ki jaka ki dei ia kaban hap teh kyndon la ki dei kiba dang seng thymmai ne kiba la rim ruh kumjuh.
Kat kum ka jingong jong u, kine ki jingteh kyndon kiba wanrah mynta, ki dei ha ka jingshisha kiba khang ia ki trai shnong ba kin ialehkai.
“Ka mut ruh ba ka thong hi ka dei kumba baroh ki kwah ba ki samla trai shnong kin ym iohlad ban ialehkai. Kane ka dei kaei kaei kaba kwah da ki paidbah lane ki kynhun Sengbhalang…ta ka daw ka jingkylli ban pyndam noh ia ka ain kam mih satia namar kane ka dei ka Ain kaba donkam ban teh kyndon ia ki kam khalai bad ruh ban teh kyndon ia ki briew kiba ialehkai” ong u Conrad.
“Ka jingkylli ka mih tang halor ka jingthmu ban seng ia ki kam khalai ba thymmai (casino) ia kaba ngi la kren shai ba kane ka sorkar kan ym pyniaid shuh shakhmat bad tad hadien ka jingiasyllok bad ki kynhun bapher bapher, ngin sa shim rai kumno ban jam shakhmat” ula bynrap.
U Myntri Rangbah ula pynkynmaw ruh ba ka Meghalaya Regulation of Gaming Act, 2021 ka dei kaba la mynjur da baroh 60 ngut ki MLA.
“Ka dei ka ain bad baroh ki MLA kynthup ki Liang Synshar bad baroh ki don bynta lang” ula ong.
