Dibrugarh, Lber 30: Ka myntri ka tnad Agriculture, Animal Husbandry and Co-operative jong ka Jharkhand, ka Shilpa Neha Tirkey, ka la kynthoh ia ka sorkar BJP ba ialam da u Himanta Biswa Sarma ha Assam, da kaba kynnoh ba kam shym la lah ban pyndep ia ki jingkular ba la ai sha ki nongtrei kper slasha.
Haba ïakren bad ki nongthoh khubor ha Dibrugarh, u Tirkey u la ong ba ka BJP ka la kular ban ai bai bylla T. 351 shisngi ïa ki nongtrei kper slasha ha ki elekshon ba la dep hynrei kam shym la lah satia ban pyndep.
“Ka BJP ka la kular ban siew ₹351 ia ki nongtrei ha ka kper slasha, hynrei kim shym la pynthikna wat ia ka bainong kaba rit tam ruh”, ka la ong.
Ka la pynpaw ruh ia ka jingsngewkhia halor ka jingsam ia ki patta jaka sha ki nongtrei kper slasha, da kaba kynnoh ba ka rukom treikam ba duna ka jingmut.
“Ki la kular ban ai patta jaka ia ki nongtrei kper slasha hynrei ki la shet kylla ia ki, kaei kaba la ai kadei tang ki kot ki sla ki bym don dor satia”, la ong ka Tirkey.
Haba buh jingkylli ia ka jinglong ain bad ka jingsynshar jong kane ka jingleh, ka la bynrap, “Hato ki la iamir jingmut bad ki nongpyniaid kper slasha?Lada kane ka kam ka leit sha ka iingbishar, kaei ka ban jia?Khlem ka jingiasngewthuh jingmut kaba biang bad ki bor pyniaid kper slasha, ka jingsam patta sha ki nongtrei kiba duk ka wanrah ia ka jingbym thikna.”
Da kaba kynnoh ba ka BJP ka la ai “ki jingkular lamler”, ka Tirkey ka la ong ba ki jaitbynriew kiba don ha ki kper slasha ki la shah ialam bakla ha ki mat ba kongsan jong ka jingim.
Katba ka Jharkhand Mukti Morcha (JMM) kaba iatreilang bad ka Congress ha ka Sorkar Pdeng bad ha Jharkhand, ka la pynieng 21 ngut ki kyrtong ha ka iingdorbar Assam kaba don 126 ngut ki dkhot.
U Myntri Rangbah ka Jharkhand, u Hemant Soren, ula ialap elekshon ruh ha Assam, ha kaba u la wad ban khring ia ki nongthep vote jong ki kper sha.
