Pynkhreh ka Jylla ia ka tamasa Jingbam 2026 ban pyni nam ia ka jingriewspah ki bam tynrai

Shillong, Lber 26: Ka Tnad Tourism jongka Jylla ryngkat bad ka Meghalayan Age Limited (MAL), kala pynkhreh ban pynlong ia ka Culinary Cascade 2026 ha ka 27-28, Tarik u Lber ha Ward’s Lake, Shillong.

Kane ka tamasa ka dei da ka jingthmu ban pyninam ia ki jingbam, kolshor bad ban kyntiew ia ka ioh ka kot lyngba ka jingdie ia ki jingbam ka ban long kum ka jingthaw ia ka lad kaba thymmai ha ka kam jngohkai bad ka jingroi ba neh.

“Ka Culinary Cascade ka long kum ka rynsan ka ban wanrahlang ia ki jingbam, kolshor bad ia ka imlang sahlang bad thaw ia ka lynti iaid kaba thymmai na ka bynta ka kam jngohkai bad ki lad kiba iaineh na ka bynta ki shnong, nongrep bad ki nongsengkam ha ka liang ka bam” ong ki ophisar na ka Tnad Tourism.

Kane ka tamasa kan wanlam ia ki jingbam kiba bun jait, kynthup ia ka jingiakren halor ka rukom shet ia ki jingbam, ka jingpyninam ia ki jingshet kiba thymmai bad ka jingiakren bad kiba buh ia ki dukan bam.

Ka bynta kaba kongsan kadei ka jingbuh ia ka ‘Food Museum’, ki jingpynbyrngia, Digital Storytelling bad ka jingiakren bad ki nongshet kiba pynmih ia ki jingbam ki bapher bapher jong ka jylla Meghalaya.

Ki nongwankai ki lah ban sakhi ia ki jingbam tynrai jong ki jaidbynriew Khasi, Jaintia bad Garo ha ryngkat bad ki jingbam kiba ju shet bad die ha ki surok. Kane ka Tamasa kan plie lad ruh ia ka rynsan na ka bynta ki nongpynmih bam na ka jylla bad ia ka khaii pateng ban pyniar ia ka jingiohi bad ka jingkhlain ka jingpyniasoh bad kiwei pat ki iew.

“Kane ka sienjam kan iaid ryngkat bad ka jingiohi jngai jong ka sorkar ban pynkhlain ia ka jinglong jingman ha sawdong sawkun jong ka kam jngohkai bad ban kyntiew ia ka ioh ka kot ha kaba iadei bad ka bam ka dih, ka rep ka riang bad kiwei kiwei ki bynta” la pynpaw ki ophisar.

Kane ka tamasa kadei shi bynta jong ka jingpyrshang ka sorkar ban buh ia ka Meghalaya ha ka kyrdan jong ka kam jngohkai ha kane ka pyrthei ban pyninam ia ka jinglong kyrpang bad ia ka kolshor kaba naduh hyndai hynthai jong ka jylla.