Guwahati, Lber 26: U Chief Secretary ka jylla Assam u Ravi Kota ha ka sngi Palei u la pynthikna ha ki paidbah ba kam shym la don ka jingduna petrol bad diesel hapoh ka jylla, ha kaba u la pynpaw ba kumba long mynta ha Assam ka dang tam da 73% na ka jingpynmih haba nujor bad ka jingpyndonkam.
U la ong ba na ka jingdon jong ka petrol bad diesel baroh kaba la pynmih na ki saw tylli ki refineries, ka Assam ka dang pyndonkam tang kumba 27%, kaba pyni shai ba ka jingsupply ka dang biang.
Katkum ka jingkhein na ki heh ophisar, ka jingpynmih ba man la u bnai na ki saw tylli ki refineries, kynthup ia ka Numaligarh, ka long haduh 168 hajar metric ton ka petrol (MS) bad 403 hajar metric ton ka diesel (HSD). Ka jingpyndonkam jong ka jylla man u bnai ka duna bha, kaba long 63 hajar metrik ton ka petrol bad 92 hajar metrik ton ka diesel, kaba pynlong ïa ka ban tam ha ka shi bnai ka long 105 hajar metrik ton ka petrol bad 311 hajar metrik ton ka diesel.
Ula ban jur ba “ym don daw ban tieng ne klumar jingmut,” haba kyntu ïa ki paidbah ba kim dei ban pynleit jingmut ban thied umphniang bun ne stock lypa khlem da donkam. U la pynmih ruh ia ka jingmaham kaba tyngeh pyrshah ia kiba thied ia ka umphniang petrol bad diesel ha ki jyrkin ki bym shngain ne ki jingbuh ki bym long shngain, da kaba ong ba kum kine ki rukom ki long kiba ma bad kiba be-aiñ.
