Nongpoh, Lber 26: Ka bor district ka Ri Bhoi District hadien ka jingbthah ka sorkar jylla, ha ka sngi Palei, kala thaw ia ka District LPG Supply Monitoring Committee ban khmih bniah ia ka jingsdang duna ka jingshalan ia ki tyndong lyer LPG ha ka district.
U Deputy Commisioner Abhilash Baranwal haba kren bad ki Nongthoh Khubor, u la ong ruh ba ia kane ka committee la thaw hapdeng ki ophisar ka district kumjuh ruh ki trai jong ki Gas Agency ban bishar bniah halor ka jingshalan tyndong lyer LPG bad ruh ka jingpynpoi ia ki tyndong lyer na ki company shalan tyndong lyer bad ka jingai bhah ia ki nongpyndonkam tyndong lyer kumjuh ruh ban buh ia ka thup jong ki nongpyndonkam ia ki commercial LPG.
U la iathuh ba namar ka thma hapdeng ka Israel-US pyrshah ia ka Iran ka la wanrah ia ka jingduna ha ka jingshalan tyndong lyer haka Ri bad kane kala ktah ruh ia ka district bad buh jingeh ïa ki nongshalan ne gas agency ban pyndap ia ka jingdonkam ki paidbah.
U DC u la pyntip, ba ki paidbah kin hap ban bud thik ia ki kyndon ba la buh da ka sorkar kata ban book ia ki cylinder kumba long ha ki thaiñ khap sor kumba 25 sngi bad ha ki thaiñ nongkyndong pat 45 sngi bad la kyrpad ia ki paidbah ba kim dei ban khih khuslai ne ban don ka jingsheptieng ha kaba ia dei bad ka jingshalan tyndong lyer namar na ka liang ka sorkar hi ka dang ialeh katba lah ban pynbiang ia ka jingshalan.
Na ka liang u trai jong ka Ri Bhoi Gas Agency, u Bah Victor Maxx Rynjah, u la ong ba watla ka jingshalan ka la kham duna hynrei kam don ka jingkyrduh tyndong lyer kumta ki paidbah kim dei ban khuslai namar ba ki company kiba ju pynpoi LPG ki la pyntikna ban pynpoi beit ia ki tyndong lyer, da kaba bynrap ruh ba ki paidbah kim dei ban khnium ia ki gas agency namar ki dei tang ki nongsam gas hynrei ka dei ka kamram jong ka sorkar jylla ban pynbiang ia ka jingshalan.
Na ka liang u Bah BB Makdoh, President ka Synjuk ki Rangbah Shnong ruh u la pynpaw ia ka jingsngewkhia kaba jur halor jingklumar jingmut ki paidbah namar ka jingsdang kyrduh tyndong gas bad u la kyrpad kyrpang ia ka sorkar jylla ban shimkhia mardor ban weng ia kane ka jingeh.
