Shillong, Lber 26 : Ka Khasi Students’ Union (KSU) kala aiti ia ka thup jingdawa ba san tylli ki mat ha u Chief Secretary ka Jylla Dr Shakil P Ahammad, haba maham ban leh da kaba tyngeh lada ka Sorkar kam lah ban leh eiei halor kine ki mat.
Ka jingdawa ka kynthup ia ka jingpyntreikam ia ka amendment jong ka Meghalaya Identification, Registration (Safety & Security) of Migrant Workers Act, 2020, ka jingpynkylla ia ka rukom treikam ha ka District Selection Committee, ka jing weng noh ia ki jingbthah ia ki khynnah skul ban rwai “Vande Mataram”, bad kyndang ia ki nongbuhai shnong be-ain na Mahadev Khola bad Maxwelton Estate.
“Ngi pynrem jur ia ka jingbym lah ka Sorkar ban pyntreikam ia ka Act wat hadien arsnem ba mynjur ia ka Bill. Lada dang don kano kano ka jingpynslem, ngi hap ban pynlong biang ia ka jingkyndang ia ki nongbylla bar jylla” ong u General Secretary ka KSU samla Donald V Thabad bad Asst General Secretary Reuben Najiar ha ka dorkhas.
Haba iadei bad ka District Selection Committee, ka KSU kala pynpaw ba ka result ba dang shu pynmih ka dei kaba “don jingbakla bad ka leh bakla palat liam, kaba dap da ka jingjied briew lajong bad ka bamsap”.
“Lada ym wanrah ia ka jingpynkylla, ngin shim ia ki jingiakhih kiba iapher ha ka Nongbah bad ki Headquarter jong baroh ki District” kila maham.
Ka KSU kala pyrshah ruh ia ka jingbthah ban rwai “Vande Mataram” ha skul, haba kdew ba ka dei ka jingrwai ba kren shaphang ki Blei Hindu, ka bym iahap satia ban pynbor ha ka ban pynrwai ia baroh ki jait niam ha kane ka ri kaba burom ia baroh ki jait niam.
“Lada ka Sorkar ka dang bteng ban pynmih ia kum kine ki jingbthah, ngim banse ban shim ia ki sienjam kiba tyngeh” kila pynpaw.
Ka Seng kala kyntu ruh ia ka Sorkar ban pynsted noh ia ka kam ba iadei bad ka jingkyndang ia ki nongbuhai shnong beain na Mahadev Khola bad Maxwelton Estate, bad ban leh eiie halor ka jingthungkam ba dang sahteng ha NEIGRIHMS.
“Ngi kyrmen ba ka Sorkar kan shimkhia ia ki jingdawa jong ngi bad ban leh eiei mardor ban pynbeit ia kine ki kam bala sahteng la slem” ong kine ki nongialam ka KSU.
 kala aiti ia ka thup jingdawa ba san tylli ki mat ha u Chief Secretary ka Jylla Dr Shakil P Ahammad, haba maham ban leh da kaba tyngeh lada ka Sorkar kam lah ban leh eiei halor kine ki mat.){kind=link}