Shillong, Lber 26: Ka jylla kala pynkhreh ban plie ia ka Indian Sailing League (ISL) ha ka Orchid Water Sports Complex, Umiam Lake, kaban sdang naduh ka 27 haduh ka 31 tarik u Lber, 2026.
Ia kane ka jingiakob yn pynlong da ka Umiam Sailing Club ryngkat ka jingiatreilang bad ka Department of Tourism ka Sorkar Meghalaya bad ka United De Novo Association of Yachting (UDAY), ha kaba 182 ngut ki nongking lieng na ki 8 tylli ki ri kin wan ban iashimbynta.
“Ka jingshah jied jongka Orchid Water Sports Complex ha Umiam ka pyni ba ka Meghalaya ka pynleit jingmut bha ha kaban kyntiew ia ka Adventure Tourism bad ki jingdon ia ki jingtei ha ka Water Sports kaba iahap kyrdan ha ka pyrthei” la ong ki ophisar.
Ha kane ka League kin don 14 tylli ki kynhun na kylleng ki thain jong ka ri India kynthup ruh ia ka kynhun ka jylla ka Shillong Umiam Navigators.
Kiwei kiwei pat kiban iashimbynta ki kynthup ia ka Deccan Skippers, Secunderabad Daredevils, Goa Mariners bad Chennai Sailing Knights bad kiwei kiwei.
Ha kane ka jingiakob ka jingpynlut pynsep ha kaban sam ia ki khusnam baroh kan kot ia ka T.1.5 Klur bad ki kynhun kin iakob ban iaknieh ia ka song pisa kaba kot T.21 lak bad ki nongialehkai shimet pat kin iaknieh ia ka nam jop ban ioh ia ka T.1.5 lak.
“Ka Indian Sailing League kan nang kyntiew bad pyniar ia ka jingialehkai kaba kham shongshit” la ong ki ophisar bad ka iathuh ba ka Meghalaya kala kylla long kum ka shlem na ka bynta ka Water Sports bad Adventure Tourism ha India bad ha ka dewbah South Asia.
Kane ka lympung kan plie lad ia ka jingiar jong ka jingshemphang, ban rakhe ia ka jingshlur, mariang bad ka jingriewspah ka Meghalaya ia ka jingdon jingem ki jaka kiba itynnad ryngkat bad ka kolshor bad kan don ruh ka jingpynbyrngia na ki kynhun tem hapoh jongka Chief Minister’s Meghalaya Grassroots Music Program (CM-MGMP).
“Ngi dap da ka jingsngewkmen ban pynlong bad ban plie pyrda ia ka Indian Sailing League, kaba pyni ia u mawmer uba kongsan ia ka jylla Meghalaya” la ong ki ophisar.
Ha kane ka lympung iakob kaba 5 sngi, yn pyni ia ki jingiakob ki bapher, ha kaba ki kynhun kiba iashimbynta kin hap ban mad ia ka jinglong jingman jong ka jinbeh ka lyer, ki buit, ka jingsted bad ka sap ka phong bad ki hap ban niah ha ka rukom kaba biang bha.
