Shillong Lber 26: Ka kynhun tem ba pawnam ka ri Bilat ka “Def Leppard’ ha ka sngi sngi Balang, kala pynshongshit ia ki hajar ki paid ieid jingrwai kiba la wan na kylleng ki jaka sha ka Concert kaba la long ha RBDSA Sports Complex, Ri Bhoi District.
Ia kane ka concert jong ka Def Leppard la pynlong da ka BookMyShow Live ha kaba ki paitbah da ki hajar ngut na kylleng ki jylla ka thain shatei lammihngi kila ialum ban sakhi ia kane ka kynhun tem Rock ba pawnam ha ka pyrthei kaba la wan iuhkjat nyngkong eh ha Meghalaya ban sdang ia ka Tour hapoh ka ri India bad nangne kane leit ban tem ha Mumbai bad Bengaluru.
La sdang ia kane ka Concert da ka kynhun ‘Trance Effect’ bad hadien kane ka kynhun Def Leppard kala kiew ha ka rynsan ban pynshongshit ia ki paitbah da ki jingrwai kiba pawnam ki jongka kiba kynthup ia ka ‘Bringin On the Heartbreak’, ‘Hysteria’, ‘Animal’, ‘Love Bites’, ‘Photograph’, ‘Rock of Ages’, ‘Animal’, ‘Foolin’’bad kiwei kiwei bad kala pynkut pat ia kane ka concert da ka jingrwai kaba pawnam tam “Pour Some Sugar on Me”.
Nalor kane u nongtem drum uba don tang shilliang kti u Rick Allen haba ula tem Drum marwei, ki paitbah kila ia risa ban iohi ia ka jingtbit une u nongtem drum.
Katba kane ka Def Leppard ka dang rwai bad tem ia ki jingrwai kiba pawnam, ki hajar ngut ki paidbah naduh kiba dang samla haduh kiba la rangbah kila iarwai lang bad ban shad bad kane ka kynhun tem Rock kaba la don 49 snem ha ka jingiaid lynti ka jongka ha ka tem ka put.
U Naman Pugalia, Chief Business Officer – Live Events, BookMyShow, ula ong, “Ka Def Leppard ka mihkhmat ia ka juk jong ka jingtem Rock kaba la pynwandur ia ka pateng jong ki nongied jingrwai ha India bad kila ioh ban shem bad pyniasoh bad kane ka rukom tem. Haba sakhi ia ka jingkhraw kane ka kynhun kaba la pynkhie im ia la ka sap ha ka rynsan, man la ki riewieid jingrwai kila iarwai lang bad kane kadei ka jingpynkynmaw kaba khlain ia ka jingngam jylliew bad ka jingia neh slem jong ka jingtem Rock ha kane ka ri”.
“Kane ka jingwan ne ‘Tour’ kala pyni shai kdar ia ka jinglong jingman kaba shongshit, ha kaba ka kynhun tem kaba pawnam ha ka pyrthei kala ioh ban pyniasoh bad ki nongpeitkai ka ri India ha ka rynsan kaba heh” la ong u Pugalia.
Hadien kane ka jingsdang ia ka jingtem kaba shongshit ha Shillong, ka Def Leppard kan leit ban tem sa ha Mumbai bad hadien kane kan leit sa sha Bengaluru ban pynkut ia ka tour ka jongka hapoh ka ri India.
