Agartala, Nailur 26: Na ka liang ka seng BJP ha Tripura kala pynpaw ia ka jingsngew skhem ba kan wanphai biang ha ka bor bad ban jop ha baroh ki 60 tylli ki set ha kane ka ilekshon assembly 2023.
Haba kren halor kane ka phang shibynta jong ka jingialang ‘Chintan Baithak’ ha Agartala, u nongialam ba la rim ka BJP ha Tripura, u Subrata Chakraborty ula ong ba ka saffron party kam shym la pynkhreh ban iatehlok bad kino kino ki party sain hima na ka bynta kane ka ilekshon assembly ka ban wan.
Lah ban kdew ba ka seng BJP ha Tripura ka dei kaba pyniaid ia kasorkar ha ryngkat ka party synrop IPFT.
“Ka BJP kam don satia ia kano kano ka jingpyrkhat na ka bynta ki paralok thymmai. Ngim shym la pyrkhat ruh ban iehnoh ia ka paralok barim jong ngi,” ong u nongialam ka BJP u Subrata Chakraborty.
Nalor kata une u nongialam ka BJP ula kam ruh ba ka party BJP naduh kine ki khyndiat por ba la dep kala lah ban nangpynkhlain ia ki ktem ki jong ki ha ki jaka kiba hap hapoh ki autonomous district council (ADC) ha ka jylla, kata kaba kham bun ki dei ki nongshong shnong kiba dei ki trai shnong.
“Ha ki jaka kiba hap hapoh ki ADC ka Tripura ruh ka BJP kala pynkhlain ia ki ktem ki jong ka,” ong shuh shuh u Chakraborty.
Haba kren halor ka jinghiar ka jingai jingkyrshan da ka paralok synrop IPFT jong ka ha ki thain jong ki trai shnong ka Tripura, une u nongialam ka BJP ula ong ba ka IPFT kan hap ban pynkhlain ialade.”
