Shillong Nailur 25: Ki shipai jong ka Assam Rifles kila ioh kurup haduh 5,05,000 tylli ki dawai kuli pynbuaid Methamphetamine kiba don ia ka jingkhia kaba 55.80 Kg bad ba shongdor palat T.167.86 Klur.
Ia kitei ki dawai kuli pynbuaid la ioh kurup naka shnong Melbuk kaba hap ha Champhai District jong ka jylla Mizoram haka 23 tarik mynta u bnai, ha ka jingleit khynra kaba la pynlong da ki shipai Assam Rifles bad ki pulit jongka Zokhawthar Police haba kila ioh ia ki jingtip kiba thikna.
Ki shipai jong ka Assam Rifles ryngkat bad ki pulit kila iohbat ia kawei ka kali ia kaba la suba jur bad ishan khmat bad haba khynra ia kane ka kali, kila lap ia ki dawai kuli pynbuaid ia kaba la kit da kawei ka longkmie kiba don baroh 5,05,000 bad shongdor 167,86,20,000 Klur tyngka.
Ia kane ka longkmie bad ia kitei ki Methamphetamine tablet la aiti noh sha ka Zokhawthar Police Station, ha ka 24 tarik mynta u bnai khnang ba kan ioh ban pynlong iaka jingtohkit kaba bniah bad pynngat ia katei ka longkmie hapoh ki kyndon aiñ.
Ha kine ki shi snem tam, ka Assam Rifles kala shimkhia ha kaban kthong ia kiba donkti ha kaban khaii ia u drok, ki tiarsiat bad ki tiar pynbthei bad ka jinglong jingman ka bym biang hapoh ka ri Myanmar kala lam sha ka jingjur jongka jingkhaii be-aiñ bad ka jingwan rung tuh jong ki briew.
