Shillong, Lber 12: U Myntri ka tnad Food Civil Supplies & Consumer Affairs Bah Methodius Dkhar ula pynthikna ba ka jylla ka don pahuh ia ka lyer shet jingshet ha iing ne Domestic Cooking Gas bad kan leh da kaba tyngeh pyrshah ia kiba die tuh, wat ki heh ophisar ha rilum Garo ki dang ïaleh ban pynbiang ia ka jingpynpoi lyer shet jingshet ha iing hadien ba mih ka jingiakynad.
“Ngi don pahuh ka lyer shet ia mynta bad ka sorkar ruh kala pyntreikam ia ka State Level Committee hapoh ka jingkhmih jong u Chief Secretary ban buddien ia ka jingdon ka lyer shet bad ka jingpynpoi kaba man ka sngi sha ki paidbah,” ong u Myntri haba kren bad ki lad pathai khubor hadien ka jingialang pyrkhat kam kaba long ha kane ka sngi Palei.
Shuh shuh ula ong ruh ba ka jingpynpoi ia ki lyer shet ha ki iingsah kadei ka kam kaba hakhmat eh ha kane ka sorkar. “Kumta nga kwah ban kyrpad ia ki paidbah ba kim dei satia ban syier ne tieng,” ula ong da kaba pyntip ba ka thong kaba hakhmat eh ka long ban pyntikna ban pynpoi tikna ia ki jingdonkam sha ki jaka treikam kiba kongsan kum ki hospital, ki hostel bad kumjuh sha ki Anganwadi Centre.
Ula maham ruh ba kano kano ka jingpyrshang ban leh pyrshah yn pynngat ha ka kyndon jong ka Essential Commodities Act kumta ula kyntu ruh ia ki longiing ba kim dei satia ban khih khuslai haba iadei bad kane.
“Yn sa leh da kaba tyngeh ia kito kiba pynbakla lynti lane kamai be-aiñ ia ki tyndong lyer shet hapoh ka Essential Commodities Act.”
U President jong ka Khasi-Pnar Gas Agency u Bah RL Blah ula pyntip ba ka tyndong lyer shet ba 14.2 kg ka shongdor ₹1,005 (₹980 + ₹25 bai kit) bad ong ba ka jingdonkam ha Meghalaya ka don haduh 21 tarik Lber.
Shuh shuh ula iathuh, ba la pahara ruh na ki kali ba kit tyndong lyer sha Garo Hills bad ong ba la mang ia ki 19 kilo ki “Commercial Cylinder” na ka bynta ki Homestay bad ong ruh ba la pynpoi sha ki Hostel bad ki jaka pule.
