Shillong, Nailur 25 : Ka Comptroller & Auditor General (CAG) of India kala lap ba ka Jylla Meghalaya kala hiar haduh 23.65% ha ka jingpynmih pisa lait noh na ka jinglum khajna (Non-tax revenue) ha kine ki san snem bala leit noh.
Ka kaiphod jong ka CAG ka pyntip ba ha u snem 2016-17 haduh 2020-2021, ka jingpynmih pisa jong ka Sorkar lait noh na ki khajna, kala hiar da 23.65% kata naka T.685.24 klur jong u snem 2026-17 sha ka T. 523.17 klur jong u snem 2020-21.
Tang jong u snem 2020-2021, kala hiar da T. 6.94 klur kaba long (-1.31%) haba ianujor bad u snem bala lah.
Ka kaiphod ka ong ruh ba ka jingpynmih pisa na ka Non-Ferrous Mining bad Metallurgy kala hiar da T. 76.40 klur (23.66%), ka Interest receipt kala hiar da T. 17.38 klur (60.12%) bad ka jingpynmih pisa na kiwei pat ki Tnad kala hiar da T. 14.32 klur (34.67%).
Ha CAG ka pyntip ba ka jingioh lum khajna jong une u snem kala duna da 7.39% na ka jingbuh antad jong ka 15th Finance Commission bad 12.81% duna ban ia ka jingbuh antad bala buh ha ki BE.
Ha kajuh ka por, ka kaiphod ka CAG la pyntip ruh ba ka Tnad Taxation ka Jylla kala lap ba don haduh 106 ngut ki briew kiba khlem siew ia ki khajna sha ka Sorkar Jylla hapdeng u snem 2020-2021.
Napdeng kine, haduh 59 ngut ki dei kiba la dep khein dep diah/tohkit bad la ioh lum tam ia ka khajna ba kot T.0.19 klur, ong ka kaiphod jong ka Comtroller Audidtor General (CAG) ka India.
Ka kaiphod ka ong ba kat haduh ka 31 tarik Lber, 2021, haduh 47 tylli ki case ki dang sahteng na kine ki bym siew khajna.
Halor ki case ba hap ban pynphai (refund) ia ka pisa kiba dang sahteng, ka CAG ka ong ba ka Tnad kan hap ban shim ia ka sienjam ha kaban pynkhuid noh ia kine ki case kat kum ka por bala buh.
Kala ong, napdeng ki 19 tylli ki case, ka jingpynphai ia ka pisa ka dang long tang saw tylli ki case (21.05%) jong ki case ka sales tax/VAT bad 113 tylli (48.50 %) na ki 133 tylli ki case jong ka GST kaba la pyndep ha une u snem.
