Dawa ka FKJGP ban khot ia ka Dorbar Kyrpang halor ka kynrum kynram GHADC

Shillong, Lber 12: Ka Federation of Khasi Jaiñtia and Garo People (FKJGP) ka la kynnoh ia ka Sorkar Meghalaya Democratic Alliance (MDA) ba ka long thurmur ba sa wan jia ka jingkulmar ha Garo Hills, bad kala dawa baka Sorkar kadei ban khot mardor iaka jingialang kynhun Myntri Sorkar lane ka Dorbar Kyrpang ban pynneh pynsah ïa ka hok ki trai riewlum kumba ka kdew haka khyrnit ba hynriew.

Haka kyrwoh u president ka FKJGP u Bah Dundee C Khongsit u la ong ba ka jingbitar ki paidbah ka la mih hadien ba ka Sorkar Jylla kam shym la burom ïa ka rai jong ka Executive Committee jong ka GHADC bala pynmih ha u bnai Rymphang kaba khang ïa ki bym dei ki riewlum ban ïakhun ne thep vote haka elekshon MDC.

Ka FKJGP kala kam ba jin baka Sorkar Jylla ka sngap bad pyntreikam ia ka jingpynbna ka GHADC, ka jingkulmar kan ym mih satia.

Ka Federation ka kyntu ïa ka Sorkar ban khot ia ka jingialang jong ka Kynhun Myntri Sorkar lane ka Dorbar Kyrpang ban wanrah biang ïa ka jingsuk bad ban pynskhem ïa ka hok jong ki Garo kumba la ithuh hapoh ka khyrnit ba hynriew.

Ka FKJGP ka la kynthoh ruh ia u Symbud Myntri Rangbah u Bah Prestone Tynsong halor ka jingkren jong u ba ki sengbhalang ki khanglad ïa ka roi ka par lyngba ka jingpynbna Non Corporation Movement.

“Hato ka roi ka par ka kham ia ki briew kiba nabar ka kham kongsan ban ia ka jingiada ia ki riewlum” la buh jingkylli ka FKJGP.

Ka la kynthoh ruh ïa ka jingkam u Symbud Myntri Rangbah ba kynnoh ba ki Sengbhalang ki pynthut ia ka roi ka par hapdeng ka jingiakhih ki Sengbhalang ha Garo Hills bad kynthoh ia ka jingkyntait ba don jingiasoh ka kajia GHADC bad ka jingdawa Inner Line Permit.

Ka Meghalaya ka duna ki lad jingiada ba khlain kum ka ILP ban tem iaka jingwan buhai shnong ki briew ba nabar, ka la ong haba kylli hato u Bah Prestone u la “klet ba ka jingkulmar ha Garo Hills ka mih na ki briew kiba nabar kiba ym tang ba ki bat ia ka khaii pateng hynrei ki kyntur sha ka synshar khadar.”

Ka FKJGP ka kyntu ïa u Bah Prestone uba bat ruh ïa ka tnat District Council Affairs, ba un sangeh noh “ban theh umphniang ïa ka ding” da ki jingkren kiba iehnoh ïa ki lad jingïada jong ki riewlum lyngba ka khyrnit ba hynriew.

Ka FKJGP ka la dawa ba ka Jylla kan burom ïa ka hok jong ki trai ri trai muluk ban ïa kaba buh hakhmat eh ïa ka roi ka par jong ki briew kiba nabar.

Haba pynrem ïa ka sorkar, ka FKJGP ka la pynshlur ïa ki nongshong shnong Garo “ban ym duh jingkyrmen, hynrei ban bteng ïa ka jingïakhun haduh ba ka Sorkar kan pynurlong ïa ki jingdawa jong ki.

Kane ka wan ha ka por ba u Myntri Rangbah ka Jylla u Conrad K Sangma uba la pynbna ba la pynkynriah ïa ka ilekshon GHADC bad kyrpad ban pynneh iaka shongsuk shongsaiñ hadien bun sngi baka sakhi iaka jingkynad.