Nongstoin, Nailur 25: Ka Nongstoin Block Congress Committee (NBCC), ka la sdang shait shait ia ka jing pynkhreh ban ioh noh ia ka jingjop ha ka elekshon MLA ka ban sa long ha u 2023.
Ka NBCC ha ka sngi saitjain, ka la pynlong ia ka jingiasyllok kaba sani hapdeng ki nongialam bad ki nongkitkam bad kala shim ia ka rai ban pynkhlain ia ka party ha baroh ki kyndong kynshrot jong ka Nongstoin Contituency ban pynthikna ba u kyrtong un ioh noh ia ka jingjop.
Ha kane ka jingiakynduh la iadonlang ruh u MDC ka Nongstoin Bah Gebriel Wahlang u ban long u kyrtong jong ka Party sha ka elekshon MLA-2023.
U Bah Gabriel Wahlang haba ai jingkren sha ki para nongkitkam ka party, u la kyntu ban wanrah ia ka jingialong kawei bad ka jingiatylli para nongialam. U la ong ruh ba kum ki dkhot bad nongkyrshan ka party, kaba donkam ka long ba baroh hi kin trei shitom da ka mynsiem jong ka jingieit bad jingsngewrit, ban ialap ban iawer sha kiwei pat khnang ban wanrah ia ka nam ka burom jong ka Congress ha Nongstoin.
Na ka liang u Bah Bormanding Nonglang President jong ka District Congress Committee, u la kyntu ia ki nongia lam ka NBCC, ba kin trei shitom naduh ka mynsiem bad ban hiar sha ki shnong ki thaw ban ialap ia ki nongrim jong ka party sha ki paidbah.
U Bah Gabriel Wahlang ha ka elekshon MLA 2018, ula shah rem tang 60 vote ha u MLA ba mynta u ba dei na ka seng NPP.
Hynrei ha ka elekshon MDC kaba la long ha u 2019, u Bah Gabriel Wahlang u la jop don burom haduh 6 hajar tam pyrshah ia u kyrtong ka seng NPP.
