Shillong, Lber 10: Arngut ki briew kila iap ha ka jingther kuli ki Pulit ha ka step phyrngap jong ka sngi ba-ar ban pyntieng ia u paidbhur ba ialum paidbah hapdeng ka korphiw miet ha ka thain Chibinang, West Garo Hills.
Ia kane ka pynthikna da u Superintendent of police ka district Abraham T Sangma.
Kane ka jingjia kala jia hadien ka jingkulmar kaba mih hapdeng ki paid Garo bad ka Kynhun ki bar Jylla, kaba la kyan na ka jingpyrshah ia ki bar Jylla ban thep kyrteng kum ki kyrtong ha ka elekshon GHADC ban long la 10 tarik Iaiong.
“Ki dei ki nongshongshnong ka Chibinang. Kala don ka huri hura hapdeng ki riewlum bad ki bar Jylla haba iadei bad ka elekshon GHADC bad ka jingther kuli kala mih haba ngi pyrshang ban beh ia ki paidbhur kiba ialum beain” ong u Abraham.
“Ka jinglong jingman ia mynta la lah ban tehlakam” ula bynrap.
Ki bor district kila pynjlan ia ka korphiw sha ka korphiw baroh shisngi ha ka district baroh kawei bad lah pan shuh shuh ia ki bor pahara ban tehlakam ia ki jingkulmar.
” Ngi la pan shuh shuh ia ki bor pahara bad kila don ha lynti mynta” ong u Abraham.
Kane ka jingjia kala jia tang katto katne kynta hadien ba ka Sorkar Jylla kala khang ia ka kor internet ba 48 kynta naduh ka miet shiteng synnia jong ka 10 tarik Lber, haba kdew ia ka jingioh khubor na u Deputy Commissioner bad u Superintendent of police ia ka jingialum briew, jingiashoh bad ki jingsaphriang ki khubor hamsaia ha ki rynsan social media kaba buh jingma ia ka suk ka sain ha ka por leit thep kyrteng ki kyrtong. Ka voice call bad SMS kam shah ktah satia.
Ka jingialang peace committee bala pyniaid da u deputy commissioner Vibhor Aggarwal kan long mynta ka sngi ba-ar ha Tura Circuit House, ka ban wanrah lang ia ki Nongialam niam, ki Nongialam sengbhalang bad ki Development Committee jong ki Shnong ki thaw ban lah pynjai jai noh ia ka jinglong jingman.
Ki bor district kila pynkhlain bha ruh ia ki bor pahara ha ki jaka thep kyrteng ki kyrtong ban iakhun ia ka elekshon, ka ban sa kut ha ka 16 tarik Lber.
Kane ka huri hura kala sdang hadien ba u MLA barim ka Phulbari Estamur Mominin ula Shah shoh ha ki Kynhun sengbhalang katba u dang poi ha phyllaw ka Ophis u Deputy Commissioner ban thep kyrteng ialade kum u kyrtong ban aireng ha ka elekshon GHADC.
Ki Kynhun sengbhalang kila dawa ia ki bar Jylla ba kin kiar ba ka jingiakhun bad jingiashimbynta ha ka elekshon ok n GHADC.
Ha ka 17 tarik Rymphang, ka Executive Committee ka GHADC kala mynjut ia ka resolution kaba pynlong kongsan ia ki kyrtong ba kin ai ia ki syrnot Scheduled Tribe ban iakhun ia ka elekshon GHADC.
