Assam | Shah kem 4 ngut ki nongtrei ka Congress katba dang kit ia 10 lak copy ki chargesheet 

Guwahati, Lber 10: Saw ngut ki nongtrei ka Congress ki la shah kem katba ki dang kit ia 10 lak kopi jong ka chargesheet ba don ki “20 tylli ki mat ba pyrshah ia ka sorkar BJP bad kumjuh ia u Myntri Rangbah ka jylla u Himanta Biswa Sarma.

Ki pulit Assam ki la kem ia kitei ki saw ngut ki nongtrei ka Congress katba ki dang kit ia ki kopi.

Ki tyllong khubor ki la iathuh ba ia kine ki kopi la kit ban sam ha ka por ba ialap elekshon sha ka iing dorbar thawain ka jylla ha u bnai ban wan.

Ia kitei ki “chargesheet” la pyllait da ka Priyanka Gandhi, nongialam jong ka seng Congress bad kiwei kiwei ha Guwahati, ha ka 19 tarik Rymphang.

Ka party Congress ka la pynpaw katto katne ki jingkynnoh — kynthup ïa ki jingkynnoh “bamsap kaba jur” bad ka jingbym lah ban pyndep ïa ki jingkular shwa ka jingthep vote — pyrshah ïa ka jingsynshar.Ka la kynnoh ruh ba u Sarma u la shim ia ka jaka kaba 12 hajar bigha ha ka kyrteng jong kiba ha iing jong u.

U President ka APCC uba dei ruh u dkhot jong ka Lok Sabbha u Gaurav Gogoi u la iathuh ba ia kitei ki kopi la kurup da ki briew na Dispur police station ha Guwahati.

“Ka BJP ka pyniaid ia ka jingsynshar donbor bad ka khanglad ia ka Liang Pyrshah ban rah ia ka jingshah kynnoh pyrshah ia ka sorkar sha ki paidbah.Hynrei ki paidbah ka Assam mynta ki la tip ia ka jingbamsap jong ki bad kin ai ia ka jubab kaba biang ha u snem 2026,” la ong u Gogoi.