Shillong, Lber 9: U Myntri Rangbah ka Jylla Conrad K Sangma ula pynrem jur ia ka jingshah khein poh jaidbynriew ki arngut ki briew ka thain Shatei Lam Mihngi ha New Delhi, haba pynpaw ba kane ka jingjia ka dei kabym ilah shah shuh bad dawa ia ki bor khmih ba kin leh da kaba tyngeh pyrshah ia kito kiba donkti.
Kane ka jingkynnoh thombor kala jia hajan ka Saket District Court Complex ha ka thain Malviya Nagar hynnin ka janmiet sngi U Blei. Kat kum ka khubor, kawei ka samla Kynthei na Manipur bad uwei u Bah kong (transgender) na Assam, kila Shah shoh ha ka Kynhun ki shynrang ha ka park, kaba la pynmih biang ia ka jingsngewkhia halor ka jingshngain ki briew na ka thain Shatei Lam Mihngi kiba sah hapoh ka Nongbah ka Ri.
Haba kynthoh ia kane ka jingjia, u Conrad ula ong ba ula kem bitar ia ka jingiai jia kine ki jingthombor ia ki briew kiba dei na ka thain, kiba sah ha rithor ka Ri.
“Ka jingjrong kti ia ki arngut ki briew na Manipur bad Assam hajan ka Saket Court, Delhi, ka dei kabym ilah shah shuh. Ia ka jingleh baheh namar ka jingsngew pher jaidbynriew ym dei satia ban pdiang kum ka kam ba ju jia bad ngi dei ban leh eiei pyrshah ia ki. Dawa ia ki bor khmih ba kin leh da kaba tyngeh” thoh u Myntri Rangbah ha social media.
Angered by the repeated attacks on North East people in Mainland India. The physical attack on two of our people from Manipur and Assam near Saket Court, Delhi is sickening. Racial bullying should not be accepted as the new normal and we must act against it. Urge the authorities…
— Conrad K Sangma (@SangmaConrad) March 9, 2026
U Myntri Rangbah barim ka Manipur N Biren Singh ruh ula pynrem jur ia kane ka jingjia, haba pynpaw ia ka jingsngewkhia kaba jur halor ka jingthombor bad jrong kti namar ka jingsngew pher jaidbynriew.
“Sngewsih jur halor kane ka jingjia thombor bad jrongkti ia ki arngut ki briew na Manipur bad Assam hajan Saket Court, Delhi. Kum kine ki kam thombor ba sngew pher jaidbynriew ki dei ki bym lah ban pdiang bad kim don jaka ha ka imlang sahlang jong ngi” ong u Singh.
Ula bynrap ba ki briew na ka thain Shatei Lam Mihngi ki dei ban sngew shngain, burom bad niew burom ha man ki jaka hapoh ka Ri.
” Nga pynrem jur ia kane ka jingjia bad dawa ia ki bor khmih ba kin pynthikna ha kaban tohkit mardor bad leh tyngeh pyrshah ia kito kiba donkti” ula ong.
Namar kine ki jingthoh ha social media da u Conrad Sangma bad Biren Singh, ki Pulit ka Delhi kila pyntip ba kila register ia ka case bymman bad kila buh ia ki Kynhun ban ithuh bad kem ia kiba donkti.
Ha ka kyrwoh, ki Pulit kila iathuh ba uwei u Khynnah ula dep shah kem bad ka jing khynra kala iaid shakhmat ban kem ia baroh kiba donkti.
Update:
One juvenile has been apprehended. Continuous raids are being conducted to nab the remaining accused.— Delhi Police (@DelhiPolice) March 9, 2026
“Sir, kane ka long ka hi jingpyntip ba la register ia ka case bymman hapoh ki kyndon ba iahap jong ki ain. Ka Kynhun ki Pulit ka Delhi kila iakren khlem sangeh bad ki lanot bad lah ai ia baroh ki lad jingiarap kiba donkam. Ngi la buh ia bun tylli ki Kynhun ban ithuh bad kem ia ki briew ba donkti kham kloi kat kaba lah” ong ki Pulit ka Delhi.
Sir,
This is to inform that A criminal case has been registered under appropriate sections of law. Delhi Police teams are in constant touch with the victim and are providing all necessary assistance. Multiple teams have already been deployed to identify and apprehend the accused…— Delhi Police (@DelhiPolice) March 9, 2026
Ki Pulit ki pyntip ba kin leh ruh da kaba tyngeh kat kum ka ain pyrshah ia kiba donkti. “Ki Pulit ka Delhi kim ju iashah ia kum kine ki jingjia. Da kaba tyngeh ym leh pyrshah ia ki runar ba donkti” .
