Nongpoh, Lber 09 : Arngut ki samla kila iap na ki aksiden kali katba ki dang wan phai na ka Jingiaseng jong ka Ri-Bhoi Presbyterian Synod, Synod Rangbah, kaba long hynne ka sngi U Blei ha Umden Diwon, Ri-Bhoi District.
Kat kum ka khubor Pulit, kane ka jingjia kala jia ha ka por 8 baje mynmiet hajan ka thain Umran Dairy.
Ki Pulit ki iathuh ba kine ki samla, kiba dang wan phai da ka scooty, kila pyrshang ban tam shakhmat ia kawei ka bos kaba wan na kajuh ka Jingiaseng hynrei kila takhuh bad kane ka bos bad kylla ha surok. Namar ka jingmynsaw jur, kine ki samla kila khlad noh.
Kane ka bos ba aksiden ka don u nombor ML01-7432 katba ka scooty jong kine ki samla ka don u nombor ML05-N-9547.
Kine ki samla kiba iap ki dei kiba la ithuh kum u Eliphast Umbah (24) ba na ka shnong Umdohkha, bad u samla Ribansuk Syngkli (29) ba na Bhoirymbong. La iathuh ba u Eliphast ula iap hashen katba u Ribansuk ula khlad hadien bala rah sha Umsning Community Health Centre (CHC).
Ki Pulit ka Umsning Police Station kila register case ia kane ka jingjia bad ka jingtohkit mynta kala iaid shakhmat.
