Shillong, Lber 6: Ka Directorate of Higher and Technical Education haka sngi Thohdieng, kala pyntip ba ym donkam shuh ia ki samla pule ka Meghalaya, kiban ialeh ia ka CUET‑PG, ba kin hap leit ialeh eksam shabar jong ka thain shatei lammihngi.
Kala pyntip ba ka tnad kala pyndep ia ka jingpynbiang ia ki Computer Nodes ban pyndonkam na ka bynta ka Test ha kane ka taiew.
Namar ba ka Registration kala nang kiew ban ia ki snem kiba la dep, katto katne ki samla pule kila shah pynrung ban leit ialeh ia ka eksam sha ki Centre kiba don ha kiwei pat ki jaka.
“Da ka jingdon shuh shuh ia ki “Additional Nodes”, kiba ialeh ia ka eksamin ha ka 6-7 tarik u Lber kin thoh eksam hapoh ka jylla bad kito kiba hap ban ialeh ha ka 8–10 tarik u Lber la pynkynriah noh ia ki na ki Centre ba na shabar sha ki jaka lajong” pynpaw ka Tnad.
Ki kynhun jong ka NTA bad TCS ki dang ialeh ban pynkynriah ia kiwei ruh.
“Nalor kane, na ka bynta ki tarik kiba dang sah, ki ophisar jong ka NTA bad ka kynhun jongka TCS ki dang khmih bad pyniaid shakhmat ia ka kam wat hapdeng ka jingmad ia ki jingeh kaba ki iakynduh ha kaban pyndap ia ki jingduna. Yn ym don mano mano ruh kiban hap ban leit shabar jong ka thain shatei lammihngi ban iakhun ia ka eksamin”.
Ka sorkar ruh ka dang ialeh ban thied ia 450 ki kor na ka bynta ban pyndonkam ha ki Computer Test Centres ba buh ha ki college, ha kaba ki ophisar kila ong, ba kane kan pynlong ia ki samla kiba ialeh ia ka CUET‑UG ban ym donkam shuh ban mih na la ka jong ka jylla ha u bnai Jylliew 2026.
“Ngi lah ialeh ban pynbiang ia kiba bun bah ki kor ki bor, khnang ba ki samla kin ym donkam ban mih na ka jylla Meghalaya,” ong u Director of Higher and Technical Education haba bynrap, haba kala don ka jingkiew ha ka jingpynrung kyrteng, ki samla pule kila jied hi nalade ia ka lad kaba 2 bad kaba 3 katkum ki kyndon jong ka NTA.
