Nongpoh, Lber 03 : Ka Synjuk ki Rangbah Shnong Rud Wah Umpli, ha ka sngi Ba-ar, kala leit ban ujor sha u Deputy Commissioner ka Ri-Bhoi halor ka jingsngewkhia bad jingbym hun ia ka rukom pyntrei ia ki artylli ki surok kiba hap ha Jirang bad Nongpoh Constituency.
Kat kum ka jingujor, kine ki artylli ki surok ki kynthup ia ka surok na Umden ba pyniasoh sha Byrnihat kaba 38.7 Km bala pyntrei da ka MP Agarwal bad ka surok na 20 mer sha Umdap ba 5 Km ba pyntrei da u Bah Sunshine Makri. Kine ki surok ki dei kiba la mang pisa lyngba ka skhim PMGSY.
Ki Nongialam ka Synjuk Bah Arul Makri bad Bah Anjelus Maring, kila kynnoh ba ia kine ki artylli ki surok la shu siang rong torti ia kaba ki paidbah kila pynpaw ba kim ihun satia ia ka rukom pyntreikam. Ki ong ba dei namar kane, ka synjuk kala wan ban buh daka jingujor hakhmat u DC ba un tuklar bad leh eiei.
Kine ki Nongialam Shnong kila iathuh ba ki paidbah ki dap da ka jingkmen bad jingsngewsnguh ia ka Sorkar Jylla kaba la pyn mang pisa ban shna ia kine ki surok kiba la shah ieh bad buh jingeh ia ka leit ka wan la kumba 20 snem tam. Ki ong ba ki paidbah mynta ki sngewduh jingkyrmen namar ba ki contractor la kynnoh ba ki trei torti ia ka kam.
Ki pyntip ba u Deputy Commissioner u dei ban pynlong ia ka jingjurip aba mardor khnang ba ka jingpyntrei ia kine ki surok kin long kiba paka bad kiban pynduk ia ka leit ka wan u paidbah.
