Guwahati, Lber 3: Ki karkhana shna sla ka Assam ki la peitngor bha ïa ka jinglong jingman ha Iran bad ha Middle East, da kaba sheptieng ba lada ka jingïakynad ka dang ïai bteng, ka lah ban ktah ïa ka jingshalan mar sha katei ka thaiñ, kaba dei ka nongthied ba heh tam jong ka Assam.
Hadien ka jingialeh thma ka jingkhang ia ki liengsuin bad ka jingpynsangeh ia ka internet ka la pynthut bha ia ki laiñ pyniadei hapdeng ki nongkhaïi.
Ka thma ha Middle East kan shah ktah bha ia ka jingshalan slasha na India. Haduh 50 percent na ka jingpynmih sla sha jong ka Assam la pyndonkam da ka Iran.
“Ngi la kyrmen ba ka jingpynkiew ïa ka jingïarap subsidy ba dang shen sha ka T. 15 shi kg na ka Sorkar Assam kan kyntiew shuh shuh ïa ka jingpynmih ïa u sla sha ka Assam, bad ngin sa lah ban shalan ïa ki sla sha Assam kiba kham bun sha ki ri Middle East, khamtam sha Iraq bad Iran.Ngi kyrmen bad duwai na ka bynta ka jingpynbeit kaba kham kloi,” ong u wei u nongkhaïi.
Ka Iran ka dei ka paralok ha ka khaïi pateng kaba kongsan bha na ka bynta ka India, khamtam eh na ka bynta ki mar rep bad ki mar FMCG kiba shalan shabar ri.Katba ki lad ban siew ki long kiba tlot namar ki jingpynjari kyndon, ki jingbym thikna kiba ïadei bad ka thma ki pynlong ïa ka jingpynslem ban phah mar, ki jingma ha ka jingsiew bad ka jingpyndam ïa ki jingïateh kular.Lada jia ba ka jinglong jingman ka nangjur, ka lah ban ktah ia ka dor jong ka sla sha ha India namar ka jingtam ka jingsupply.
Ka jingshalan sla sha na India ka la poi sha ka jingkiew kaba heh tam ha ki por baroh, kaba long 280 million kg ha u snem 2025.Ki ri ha Middle East ki la iohi ia ka jingdawa kaba jur.
Hapdeng u Kyllalyngkot bad Nailur jong u snem ba la dep, ka India ka la shalan kumba 254.19 million kg u sla sha.Palat 48.88 million kg la wanrah na Iraq, kumba 10.69 million kg na Iran, bad 45.66 million kg na UAE.
Ki nongshalan mar ne ki exporter ki ong ba ka bynta kaba khraw jong ki mar sha Iran ka dei kaba la iaid lyngba ka Dubai.
