Shillong, Lber 02 : I heprit Shelevah N Jyrwa ba na Laimer Upper Shillong, I la ioh ban rah ia ka nam lahduh jong ka Sur Kynud Season 4 – kaba la pynhap pyrda ha ka rukom kaba shongkun bha ha ka janmiet sngi Thohdieng ha Don Bosco Youth Centre, Laitumkhrah Shillong.
Ha kane ka lympung ia kob rwai la wan ban pynphuh da ka jingdonlang ka MLA jong ka Shillong East Dr. M Ampareen Lyngdoh, u General Coucnillor Fr. Fidel Orendain na Rome, Provincial ka Shillong Province Fr. John Zosiama, bad bun ngut ki Phadar na South Asia nalor kiwei kiwei ki riewniam bad ki kmie ki kpa bad bahaiing jong ki phra ngut ki nongiashim bynta.
Ha ka grand finale kaba la pynbit pynbiang da ka Don Bosco Media Network Television hapoh ka jingialam jong u Fr. Michael Makri kum u Director, ki la don haduh 8ngut ki samla kiba la poi sha ka kylla ba khatduh ban ia knieh ia ka song pisa kaba 1lak tyngka.
Naduh kaba sdang na ka liang ka DBMNTV lyngba ki coach ba la buh kyrpang ba kynthup ia i Samla Lapdiang bad samla Kheiñkor, ki ai ruh ka jinghikai ban pynjanai ia ka sap jong kitei ki heprit bad ki samla kiba wan aireng ha katei ka lympung.
Ha shwa kane ka MLA haba kren ha ka jingialang ka la ai ka jingiaroh kaba khraw ia ki bor pyniaid jong ka Sur Kynud da kaba ong ba kino kino ki kam ba ki riewniam ki leh kadei kaba janai khamtam lei lei haba iadei bad ki samla.
Ha kajuh ka por ka la ai ruh ka jingiaroh ia ka Don Dosco Youth Centre kaba la lah ban pynlong ia katei ka rynsan iakob rwai kaba long ka rynsan ia ki samla ban pynjanai ia ka sap ba kyrpang ba ki don. “Dei lyngba kum kine ki jingiakob la ka long ha kino kino ki lympung kiba pynlong ia ki samla ban trei shitom ba kin poi sha ka thong,” ka la ong.
U Director ka DBYC Fr. Michael Makri ha ka jingkren u la ong ba ka jingseisoh jong kane ka prokram naduh kaba sdang ka dei na ka jingkyrshan met bad mynsiem jong ki bor bahalor, nangta ki nongiarap kiba ai kylluid mynsiem kynthup naduh ka sorkar jylla bad kiwei kiwei. U la pynpaw ka jingsngewnguh ia ki Kmie ki kpa kiba la kyrshan ia ki khun naduh kaba sdang khamtam ban wan buh wan shaw bad tad haduh ban da kut kane ka lympung.
Ha kane ka sngi la sam ruh ia ka Cecilia Memorial Award sha u Br. Sniawshngain Papang bad kumjuh ruh ia ka DBMNTV Youth Icon Award 2025 sha u Bah Herbert Kharkongor, Superintendent of Police ka West Khasi Hills, bad kumjuh ka jingai sngewbha sha ki nongbishar jong katei ka jingiakob.
Kumba ju long manla u snem ki nongjop ha kane ka lympung ïa kob nalor ba ki ioh khur ïa ka khusnam pisa kaba kot haduh 1lak tyngka kin ïoh ruh ïa ka kabu ksiar wat ban leit shim bynta ha ki lympung kiba heh jong ka ri bad jong ka pyrthei ruh kumjuh.
