Shillong, Rymphang 28: Ban kyrshan ia ki nongrep jong ka jylla, ka 1917 iTEAMS ka tnad ka rep ka riang, kala pynlong biang iaka iew ki nongrep lane ka ‘Farmers Market’ ha jaka ieng kali ka Ophis Directorate of Fisheries kaba don mar pyrshah ka St. Edmunds’ College.
Ha kane ka iew nongrep, la wan ban iashimbynta da ki nongrep na kylleng ka Jylla Meghalaya naduh ki thain Jirang Ri-bhoi District, West Khasi Hills, West Jaintia Hills bad East Khasi Hills ban die ia la ki mar rep ki jongki.
Ki nongrep ki ioh ruh ka jingkyrshan kata ka bai kit iaki mar nala shnong, ka bai kali ban leit phai shala shnong bad ruh ka bam haba ki wan ban die iaki mar ha kane ka ‘Farmers Market’. Kane ka iew kala long ka rynsan ia ki nongrep ban die hi iala ki mar, haka dor kaba lah ban wanrah jingmytoi ia ki bad haka juh ka por ka ‘Farmers Market’ ka khanglad iaki nongkhaii ban leit thied iaki mar rep naki jaka rep, kaba ïalam ruh sha ka jingshah khniot ka dor kaban pynduhnong iaki nongrep.
Ha kane ka ‘Farmers Market’ la plie lad ruh ia ki kynhun sengkam lajong ban die iaki mar kiba kila shna hi kum ki Chocolate, Waiñ, Achar bad kiwei kiwei ki jait jingbam.
Haba iakren bad ki nongrep, iwei i longkmie ba West Jaintia Hills ila iathuh ba i ioh ka lad ban wan die iaki mar rep sha kane ka ‘Farmers Market’ hadien ba i phone sha iTEAMS ban pyntip ba i dang don ki mar rep ba im pat lah ban die.
“Nga la ioh ban iakren bad uwei u Bah ha ka phone bad ula bthah ia nga ban pynrung kyrteng ha ka iTEAMS bad hadien kata la wan poi ka kali ban kit ia u shynrai Lakadong na shnong sha kane ka Iew ban die” la ong i longkmie.
Ki nongrep kila pynpaw ka jingsngewnguh iaka Sorkar kaba ka plie kane ka lad ban kyrshan ia ki da kaba shim ka jingkitkhlieh ban wankit iaki mar naki shnong jong ki nongrep ban ioh die ha kane ka iew nongrep.
“Ka iew ka long kaba biang, nga la ioh die bun jait ki mar rep ba nga wanrah na shnong, nga kyrmen ba ka Sorkar kan iai bteng ban pynlong kum kane ka iew khnang ba ki paidbah ki wan thied beit na ki nongrep” la ong uwei u Bah na Jirang.
Nalor ka iew iadie ia thied, kala don ruh ka kynhun tem ban pynsngewtynnad ia ki nongrep bad ia ki nongthied nongpet kiba wan sha kane ka iew nongrep.
