Imphal, Nailur 24 : “Ka lawei jong ka Manipur ka shong ha ki kam jngohkai pyrthei,” ong u Myntri Rangbah (CM) ka jylla u N Biren Singh hynnin ka sngi Thohdieng.
Ia kane u CM Biren Singh ula pynpaw haba kren ha ka jingialang plie ia ka batch kaba nyngkong jong ka jingaihikai ha ka State Institute of Hotel Management (SIHM) ka Manipur.
Na ka liang une u Myntri ula ong ba ka jingdon ia ki jaka kiba itynnad, ka mariang kaba biang kan khring shibun ha kaba iadei bad ki kam jngohkai pyrthei.
Kiba bun ki jaka jngohkai ba pawkhmat, kum ka Sangai Ethnic Park ha Moirang Khunou, ka Loktak Lake, ka INA Memorial bad u dur mot jong u Sagol Kangjei uba 120 phut ha Marjing kin khring shibun ia ki nongwan shangkai pyrthei, ong u CM ka Manipur.
“Namar ka jingkiew ha ka jingstad ha ka liang ka teknoloji, mynta ngi lah ban iohi kumno ka jia ha kiwei kiwei pat ki bynta jong ka pyrthei bad ngi dei ban pyrshang borbah ban pynlong ia ka Manipur ka rynsan na ka bynta ki ri ka pyrthei,” ong shu shuh u CM Biren Singh.
Shuh shuh haba kren halor ka mat kaba iadei bad ka jingshah ban die ia ka kyiad kaba wan na shabar ka jylla (IMFL), u CM Biren Singh ula ong ba ka jingshim rai jong ka kynhun myntri halor kane ka bynta ka dei kaba la wan long hadien ka jingiamir jingmut kaba sani bha bad da kaba shim ruh ia ka jingai jingmynjur da ki kynhun nongshong shnong bapher bapher ka jylla.
Nalor kata ula ong ruh ba na ka liang ka sorkar jylla ka don ruh ia ka jingthmu na ka bynta ban buh ia ka karkhana pynmih beer ha ka jylla da kaba pyndonkam da ki mar ki mata kiba la pynmih hi na ka jylla, kata kum na u sohtrun bad u sying.
