“Nga dei u CM ka Meghalaya, ym tang jong ka NPP”, ong u Conrad Sangma

Shillong, Rymphang 26 : U Myntri Rangbah ka Jylla Conrad K Sangma ula pynksan ia ka rukom sam song pisa ka Sorkar jong u bad ong “Nga dei u Myntri Rangbah (Chief Minister) jong ka Meghalaya, ym tang jong ka National People’s Party (NPP)”.

Ula kren ia kane haba jubab ia ki jingkynnoh u Nongialam ka Liang Pyrshah Mukul Sangma ba ia ka song pisa la pyndonkam ha ki kam ban myntoi ka sain pyrthei.

“Nga la ai skhim ia baroh. Lada mano mano na kiwei ki seng sain pyrthei ki wan, ngam don jingwit satia” ong u Conrad haba jubab ia ka cut motion. “Nga la ai ha ki snem bala leit noh. Ha ka ingshisha, ha ki katto katne ki jaka nga la ai pynban kham bun ki skhim sha ba bun ki briew na ka Liang Pyrshah bad ki MLA jong nga kila dom ia nga”.

U Conrad u iathuh ba ula ong iala ki MLA “Nga hap ban peit lang ia barohm ngam lah ban long Myntri Rangbah tang jong ka NPP, nga dei u Myntri Rangbah ka Meghalaya. Ha nga, ka Liang Synshar-Liang Pyrshah kam don jingiapher satia”.

“Mynta ngi don ha kawei ka liang bad mynta lada ioh skhim kin sa wan sha ka liang jong ngi, kane ka ju jia naba ka kam ka iaid kumne” ong u Conrad haba bynrap “kumta ngim dei ban iaid da ka jingmut jingpyrkhat ba ngim dei ban ai ia ki briew ba don ha ka Liang Pyrshah”.

U Conrad ula ban jur ba ia ki skhim la ai haba pynshong nongrim kat kum ka jingdonkam, ym ka jingiadei bad ki seng sain pyrthei. “Nga la ai skhim sha baroh. Lada wan mano mano na kano kano ka seng sain pyrthei, ngam don jingwit satia” ula ong.

U Conrad ula ainam sha u Kpa bala khlad noh, Purno A Sangma, uba pynwandur ia ka rukom treikam jong u na ka bynta ka bha ka miat bad ka roi ka par.

“Nga hap iathuh ha phi ba nga ioh jinghikai ia kane na u Kpa bala khad noh namar kane ka dei ka rukom ba u ju leh haba sam ia ka skhim MP” ong u Conrad bad bynrap “Mano mano ba wan ruh-nga ju iohi beit ia ka jingkmen ha ki khmat jong u, ka jingkmen ha ki khmat haba u lah ban ai skhim ia ki skul lane ki shnong kaba ki donkam bad kine ki shon ha ka jingmut jingpyrkhat jong nga”.

U Conrad u ong ba ula bteng ban iaid ha kane ka juh ka nongrim treikam, buh khmat ia ka jingdonkam u paidbah halor ka jingiadei seng sain pyrthei. “Kumta, haduh mynta ngi dang iaid beit da kane ka juh ka nongrim treikam” ula ong.

Haba kubur ba bun ki briew na ka seng sain pyrthei ba synshar ki ju wan sha u, u Conrad ula bynrap “Hooid ki lah ban don ki khep ha kaba kin don bun ki briew ba wan ban iakynduh kiba na ka seng sain pyrthei ba synshar hynrei kane ka dei kaba ju jia beit, to ngin ym kyntait ia kane”.

“Ngam ju kylli la phi dei na ka NPP, pyni ia nga ia ka ID Card lane phi dei na kane ka seng sain pyrthei, em Sir. Ngi iaid beit haba pynshong nongrim halor ki jingdonkam bad ka jingdonkam ki paidbah” ong u Conrad.

U Conrad ula kubur ba bun ki MLA ki ju ai skhim tang sha la ki jong ki briew bad ong “Ka sain pyrthei ka iaid kumne ha man ki Jylla. Kam don jingleh bakla…Hynrei kam dei satia ka jingmut jong ngi ban leh kumta”.

Shuwa kane, u Myntri Rangbah ula kular ba ka jingpynkiew ia ka pisa bala mang, kaba kot T.20 klur ka dei kaba la buh beit thik tang sha ki kam pynroi, khamtam na ka bynta ka Chief Minister Special Development Fund (CMSDF) bad Chief Minister Special Grant (CMSG).

“Kaba bun na ka pisa ba ngi pan ka dei na ka bynta u paidbah, ka dei na ka bynta ki kam pynroi” ong u Conrad haba jubab ia ka cut motion. Ula pynshai ba ka jingpynkiew kam dei na ka bynta ban thied kali, haba pyntip ba ka CM Secretariat kam pat pynlut pisa satia ban thied kali thymmai.

“Ka CM Secretariat kam pat ju pynlut pisa ban thied kali. Ngim pat thied kali thymmai, ngi la pyndonkam ia baroh ka pisa na ka bynta ki kam pynroi” ong u Conrad.