Shillong, Rymphang 26 : Ka jingkren ktien Garo u MLA ka Nongthymmai Bah Charles Pyngrope ha Iingdorbar kala wanrah ia ka jingphuh samrkhie ka Iing baroh kawei ha ka sngi Palei, hadien ba u Myntri Rangbah Conrad K Sangma ula ai jingmut ban ai jinghikai ia ki MLA ba kin nang ia ki ktien trai ri.
Haba jubab iaka jingtyrwa, u Bah Charles ula pynmih ia ka ktien Garo –“Angaba ia Chanchianiko namnikaha Mittela” (“Nga sngewkmen eh bad kane ka jingiakren, khublei shibun”).
Ki dkhot ka iing kila phuh samrkhie, haba pdiang ia ka jingmut jong une u MLA bala rangbah bha.
U Conrad shuwa kane, ula ai jingmut ban pynlong ia ka jingai jinghikai ba shipor ia ki MLA ba kin nang ia ka ktien trai ri-ki Garo kin nang ia ka ktien Khasi bad ki Khasi Jaintia kin nang ia ka ktien Garo, haba iakren ia ka Policy jong ka Sorkar ban pynlong kongsan ia ki nong aplai kam Sorkar ba kin nang kren ia ka ktien trai ri.
